நில அளவையர் காலிப்பணியிடங்களை உடனடியாக நிரப்ப கோரிக்கை
தமிழ்நாடு நில அளவை அலுவலர் ஒன்றியம், நில அளவையாளர்களின் காலிப்பணியிடங்களை விரைவில் நிரப்ப வேண்டும் எனவும், மொத்தம் 14 அம்சங்களைக் கொண்ட கோரிக்கைகளை அரசிடம் வலியுறுத்தியுள்ளது.
வெளியிடப்பட்ட அறிக்கையில் அவர்கள் தெரிவித்ததாவது:
தமிழகத்தில் 6 கோடிக்கும் அதிகமான பொதுமக்களின் நில – மனை பதிவுகளை அளக்க பொறுப்பேற்றுள்ள 3,999 சர்வே அலுவலர்களே செயல்பட்டு வருகின்றனர். இதில் மேற்பார்வை மற்றும் நிர்வாகப் பொறுப்பில் உள்ளவர்களை நீக்கினால், செயல்பாட்டில் உள்ளோர் 3,517 பேர். அதிலிருந்து 1,375 பணியிடங்கள் காலியாக உள்ளதால், வெறும் 2,142 சர்வே ஊழியர்களே முழு மாநிலத்தையும் கவனிக்க வேண்டிய சூழல் உள்ளது.
துறை கணினி மயமாக்கப்பட்ட நிலையில், கைப்பிரதியைத் தயாரித்து அதனை இணையதளத்தில் பதிவேற்ற வேண்டும் என்ற இரட்டை பணிச்சுமை அதிகரித்துள்ளது. புதிய வேலைகள் வழங்கப்பட்டாலும், புதிய பணியிடங்கள் உருவாக்கப்படவில்லை என்பதும் குறிப்பிடப்பட்டுள்ளது.
மேலும், வெளியுற முகமை மூலம் 592 பணியாளர்கள் ஒப்பந்த அடிப்படையில் சேவைக்கு பயன்படுத்தப்படுகின்றனர். ஏற்கனவே காலிப் பணியிடங்களை நிரப்புதல் மற்றும் புதிய பணியிடங்கள் உருவாக்கல் உள்ளிட்ட 14 கோரிக்கைகள் நிலுவையில் இருக்க, இதுபோன்ற நடவடிக்கைகள் சர்வே அலுவலர்களை போராட்டத்திற்குத் தூண்டுவதாக ஒன்றியம் கூறியுள்ளது.
