மதுரையில் விமரிசை: கூடல் அழகர் பெருமாள் கோவில் தேரோட்டம் – பக்தி கோஷங்களுடன் வடம் பிடித்த ஆயிரக்கணக்கான பக்தர்கள்!
108 வைணவ திவ்ய தேசங்களில் 47-வது தலாமாகப் போற்றப்படும் வரலாற்றுச் சிறப்புமிக்க மதுரை அருள்மிகு கூடல் அழகர் பெருமாள் கோவிலின் வைகாசிப் பெருந்திருவிழாவின் சிகர நிகழ்ச்சியான மகா தேரோட்டம் இன்று மிகக் கோலாகலமாக நடைபெற்றது. இதையொட்டி, அதிகாலையிலேயே மூலவர் மற்றும் உற்சவ மூர்த்திகளுக்குப் பலவகைத் திரவியங்களால் சிறப்புத் திருமஞ்சனமும், தீபாராதனைகளும் விமரிசையாக நடத்தப்பட்டன. தொடர்ந்து, அலங்கரிக்கப்பட்ட பிரம்மாண்ட திருத்தேரில் வியூக சுந்தரராஜ பெருமாள், ஸ்ரீதேவி மற்றும் பூதேவியருடன் எழுந்தருளி பக்தர்களுக்குக் காட்சியளித்தார்.
தேரோட்டத்தைக் காண்பதற்காக மதுரையின் உள்ளூர் மக்கள் மட்டுமன்றி, அக்கம் பக்கத்து மாவட்டங்களில் இருந்தும் ஆயிரக்கணக்கான பக்தர்கள் அதிகாலை முதலே தேரடிப் பகுதியில் திரளத் தொடங்கினர்.
மாசி வீதிகளில் உலா: காலை 6:30 மணி அளவில் கூடியிருந்த ஆயிரக்கணக்கான பக்தர்கள் “கோவிந்தா… கோவிந்தா…” எனப் பக்தி முழக்கமிட்டு, தேரை வடம் பிடித்து இழுக்கத் தொடங்கினர்.
வண்ணமயமான தோரணங்களால் அலங்கரிக்கப்பட்ட இந்தத் திருத்தேர், மதுரையின் பாரம்பரியமிக்க தெற்குமாசி வீதி, பாண்டிய வேளாளர் தெரு, திருப்பரங்குன்றம் சாலை மற்றும் மேலமாசி வீதி உள்ளிட்ட முக்கியப் பிரதான வீதிகளின் வழியாகக் கம்பீரமாக வலம் வந்தது. தேரோட்டப் பாதை எங்கும் பக்தர்களுக்குத் தாகத்தைத் தணிக்க நீர்மோர், பானகம் மற்றும் அன்னதானங்கள் பரவலாக வழங்கப்பட்டன.
முக்கியச் சாலைகளில் போக்குவரத்து மாற்றங்கள் செய்யப்பட்டு, அசம்பாவிதங்கள் ஏதுமின்றித் திருவிழா அமைதியாக நடைபெற 200-க்கும் மேற்பட்ட காவல்துறையினர் தீவிரப் பாதுகாப்புப் பணியில் ஈடுபட்டிருந்தனர். வீதிகள் எங்கும் திரண்ட பக்தர்களின் வெள்ளத்திற்கு மத்தியில், திருத்தேர் காலை 9:00 மணி அளவில் பாதுகாப்பாக நிலையை வந்தடைந்தது.
