சர்வதேச கச்சா எண்ணெய் தட்டுப்பாடு: மின்சார வாகனங்களுக்கு ரூ.8,300 கோடி ஊக்கத்தொகை வழங்க மத்திய அரசு அதிரடித் திட்டம்!
புதுடெல்லி: சர்வதேச அரசியல் பதற்றங்கள் மற்றும் ஈரான் போர் காரணமாக, உலகளாவிய கச்சா எண்ணெய் விநியோகத்தின் முக்கிய வழித்தடமான ‘ஹார்முஸ் ஜலசந்தி’ மூடப்பட்டுள்ளது. இதனால் உலக சந்தையில் கச்சா எண்ணெய்யின் விலை தொடர்ந்து அதிகரித்து வருகிறது. தனது மொத்த கச்சா எண்ணெய் தேவையில் 85 சதவீதத்திற்கும் மேல் இறக்குமதியைச் சார்ந்திருக்கும் இந்தியாவிலும் இதன் தாக்கம் எதிரொலிக்கத் தொடங்கியுள்ளது.
இந்தச் சூழலில், எண்ணெய் இறக்குமதியைக் குறைக்கவும், நாட்டின் எரிசக்திப் பாதுகாப்பை மேம்படுத்தவும், நகர்ப்புறக் காற்று மாசுபாட்டைக் கையாளவும் மத்திய அரசு பல்வேறு அதிரடி நடவடிக்கைகளை எடுத்து வருகிறது.
முன்மாதிரியாகத் திகழும் பிரதமர் மோடி
நாட்டின் எரிசக்தியைச் சிக்கனமாகப் பயன்படுத்த வேண்டும் என்று நாட்டு மக்களுக்கு வலியுறுத்திய பிரதமர் நரேந்திர மோடி, அதனைத் தாமே முன்னின்று செயல்படுத்தும் விதமாகத் தனது சிறப்புப் பாதுகாப்பு வாகன அணிவகுப்பின் (Convoy) எண்ணிக்கையைப் பாதியாகக் குறைத்துள்ளார். பிரதமரின் இந்த முன்மாதிரியான நடவடிக்கையைப் பின்பற்றி, பல்வேறு மாநில முதலமைச்சர்கள், ஆளுநர்கள் மற்றும் அரசு உயர் அதிகாரிகளும் தங்களது கான்வாய் வாகனங்களின் எண்ணிக்கையைக் குறைத்து வருகின்றனர்.
ரூ.8,300 கோடி ஊக்கத்தொகை திட்டம்
எரிசக்திப் பாதுகாப்பை உறுதி செய்வதன் ஒரு பகுதியாக, அடுத்த பத்தாண்டுகளில் தனியார் துறையில் மின்சாரப் பேருந்துகள் மற்றும் லாரிகளின் பயன்பாட்டை ஊக்குவிப்பதற்காக, 1 பில்லியன் அமெரிக்க டாலர் (சுமார் 8,300 கோடி ரூபாய்) ஊக்கத்தொகை வழங்கும் புதிய திட்டத்தை மத்திய அரசு தீவிரமாகப் பரிசீலித்து வருகிறது. இந்தியாவின் டீசல் பயன்பாட்டில் கணிசமான பங்கைக் கொண்டுள்ள தனியார் வர்த்தக வாகனங்கள் மற்றும் நகரங்களுக்கு இடையேயான சொகுசுப் பேருந்து நிறுவனங்களை இலக்காகக் கொண்டு இத்திட்டம் வடிவமைக்கப்பட்டு வருகிறது.
அதன்படி, ஒரு மின்சார வர்த்தக வாகனத்தின் ஆயுட்காலம் முழுவதும் அதற்கு 15 லட்சம் ரூபாய் வரையிலான வட்டி மானியம் உள்ளிட்ட சலுகைகளை வழங்க அரசு யோசித்து வருகிறது. மேலும், தனியார் நிறுவனங்கள் எளிதாக மின்சார வர்த்தக வாகனங்களை வாங்குவதற்கு நிதியுதவி அளிக்கும் வகையில், ‘ஒரு பகுதி கடன் உத்தரவாத வழிமுறை’ (Partial Credit Guarantee Mechanism) ஒன்றையும் அதிகாரிகள் மதிப்பீடு செய்து வருகின்றனர்.
இந்தியாவின் மின்சார வாகனப் புரட்சி
கடந்த மூன்று ஆண்டுகளில், மின்சாரப் பேருந்துகளின் பயன்பாட்டைப் பெருமளவில் அதிகரிப்பதற்கான வலுவான அடித்தளத்தை இந்தியா அமைத்துள்ளது.
- ஃபேம் (FAME) திட்டம்: இத்திட்டத்தின் இரண்டாம் கட்டத்தின் கீழ் இதுவரை 7,090 மின்சாரப் பேருந்துகள், 5 லட்சம் 3 சக்கர வாகனங்கள், 55,000 நான்கு சக்கர வாகனங்கள் மற்றும் 10 லட்சம் இருசக்கர மின்சார வாகனங்களுக்கு மானிய உதவி வழங்கப்பட்டுள்ளது.
- மின்சார மொபிலிட்டி ஊக்குவிப்பு திட்டம்: மின்சார வாகனங்களின் முன்கூட்டிய கொள்முதல் விலையைக் குறைக்கும் வகையில் இருசக்கர மற்றும் மூன்று சக்கர வாகனங்களை வாங்குபவர்களுக்கு மத்திய அரசு நேரடியாக ஊக்கத்தொகை வழங்கி வருகிறது.
- பிஎம்-இ பஸ் சேவை: 40 லட்சத்திற்கும் அதிகமான மக்கள் தொகை கொண்ட நாட்டின் 9 முக்கிய மாநகரங்களில் 14,000-க்கும் மேற்பட்ட மின்சாரப் பேருந்துகளுக்கு ஊக்கத்தொகை வழங்கப்பட்டுள்ளது. தற்போது 50-க்கும் மேற்பட்ட நகரங்களில் 10,000 மின்சாரப் பேருந்துகள் பயன்பாட்டில் உள்ள நிலையில், மேலும் 20,000 மின்சாரப் பேருந்துகள் கொள்முதலின் பல்வேறு கட்டங்களில் உள்ளன.
இந்தியாவில் தற்போது 2 மில்லியனுக்கும் அதிகமான பேருந்துகள் பயன்பாட்டில் உள்ளன என்றாலும், அவற்றில் சுமார் 5 சதவீதம் மட்டுமே அரசுப் பேருந்துகளாகும். எனவே, எஞ்சியிருக்கும் தனியார் பேருந்துத் துறையையும், நாட்டின் சிறிய நகரங்களையும் மின்சாரப் பேருந்து நெட்வொர்க்கிற்குள் கொண்டு வருவதன் மூலம், இந்தியாவின் சுதந்திரத்தின் 100-வது ஆண்டுக்குள் (2047) நாட்டை முழுமையான எரிசக்தி தன்னிறைவு பெற்ற நாடாக மாற்ற வேண்டும் என்ற இலக்கோடு பிரதமர் மோடி தலைமையிலான மத்திய அரசு தீவிரமாகப் பணியாற்றி வருகிறது.
