ஆற்காடு அதிமுக வேட்பாளர் எஸ்.எம்.சுகுமார் தீவிர வாக்கு சேகரிப்பு: கணியம்பாடி ஒன்றியத்தில் உற்சாக வரவேற்பு!
ராணிப்பேட்டை மாவட்டம், ஆற்காடு சட்டமன்றத் தொகுதியில் அதிமுக சார்பில் போட்டியிடும் வேட்பாளர் எஸ்.எம்.சுகுமார், கணியம்பாடி ஊராட்சி ஒன்றியத்திற்கு உட்பட்ட பகுதிகளில் இன்று தீவிர தேர்தல் பரப்புரையில் ஈடுபட்டார். அவர் வருகை தந்தபோது, தேசிய ஜனநாயகக் கூட்டணி (NDA) சார்பில் திரண்டிருந்த கட்சி நிர்வாகிகள் பட்டாசுகள் வெடித்து அவருக்கு உற்சாக வரவேற்பு அளித்தனர்.
தொடர்ந்து அப்பகுதி மக்களிடையே அதிமுகவின் தேர்தல் அறிக்கையை வழங்கி வாக்கு சேகரித்த அவர், பல்வேறு வளர்ச்சித் திட்டங்களை உறுதி அளித்தார். குறிப்பாக, கம்ம சமுத்திரம் ஊராட்சி பகுதியில் இளைஞர்களின் உடல் தகுதியை மேம்படுத்த நவீன விளையாட்டு மைதானம் அமைக்கப்படும் என வாக்குறுதி அளித்தார். மேலும், இந்து சமய அறநிலையத்துறை கட்டுப்பாட்டில் உள்ள பழமையான ஈஸ்வரன் கோயிலைப் புதுப்பிக்க உரிய நடவடிக்கை எடுக்கப்படும் என்றும், தற்போது வாடகைக் கட்டிடத்தில் இயங்கி வரும் நியாய விலை கடைக்கு (Ration Shop) நிரந்தரக் கட்டிடம் கட்டித் தரப்படும் என்றும் அவர் உறுதியளித்தார். இந்த வாக்குறுதிகள் அப்பகுதி மக்களிடையே பெரும் எதிர்பார்ப்பை ஏற்படுத்தியுள்ளன.
