கும்மிடிப்பூண்டி: திமுக வேட்பாளருக்கு வரவேற்பு அளித்தபோது வெடித்த பட்டாசு – பெண் காயமடைந்ததால் பரபரப்பு!
திருவள்ளூர் மாவட்டம் கும்மிடிப்பூண்டி சட்டமன்றத் தொகுதி திமுக வேட்பாளர் டி.ஜே. கோவிந்தராஜன், தேர்தல் பரப்புரையின் ஒரு பகுதியாகப் பெரியபாளையம் பேருந்து நிலையத்தில் உள்ள அம்பேத்கர் சிலைக்கு மாலை அணிவித்து மரியாதை செலுத்த வருகை தந்தார். அப்போது, வேட்பாளரை உற்சாகமாக வரவேற்கும் விதமாக அக்கட்சியினர் பட்டாசுகளை வெடித்தனர்.
துரதிர்ஷ்டவசமாக, பேருந்துக்காகக் காத்திருந்த பெண் ஒருவரின் காலில் பட்டாசு பட்டு காயம் ஏற்பட்டது. இதனால் அங்கிருந்தவர்கள் அதிர்ச்சியடைந்த நிலையில், காயமடைந்த பெண்ணை உடனடியாக மீட்டு அருகில் உள்ள தனியார் மருத்துவமனைக்குச் சிகிச்சைக்காக அழைத்துச் சென்றனர். இந்தச் சம்பவம் குறித்து அறிந்த வேட்பாளர் டி.ஜே. கோவிந்தராஜன், உடனடியாக மருத்துவமனைக்கு நேரில் சென்று சிகிச்சை பெற்று வரும் பெண்ணைச் சந்தித்து நலம் விசாரித்தார். மேலும், எதிர்பாராமல் நடந்த இந்த விபத்திற்கு அவர் தனது ஆழ்ந்த வருத்தத்தைத் தெரிவித்துக் கொண்டார்.
