“தேர்தலுக்கு முன்பே அமைச்சர் கே.என்.நேரு சிறை செல்ல வாய்ப்பு” – திருச்சி கிழக்கு அதிமுக வேட்பாளர் ராஜசேகரன் பரபரப்பு குற்றச்சாட்டு!
திருச்சி கிழக்குத் தொகுதி அதிமுக வேட்பாளராக அறிவிக்கப்பட்டுள்ள ராஜசேகரன், நகராட்சி நிர்வாகத் துறை அமைச்சர் கே.என்.நேரு மீது கடுமையான விமர்சனங்களை முன்வைத்துள்ளார். பணி நியமன முறைகேடு புகார்கள் காரணமாக, தேர்தல் நடைபெறுவதற்கு முன்பே அமைச்சர் சிறைக்குச் செல்ல வாய்ப்புள்ளதாக அவர் தெரிவித்தது அரசியல் வட்டாரத்தில் பெரும் பரபரப்பை ஏற்படுத்தியுள்ளது.
எம்.ஜி.ஆர் சிலைக்கு மரியாதை:
திருச்சி நீதிமன்றம் அருகே உள்ள எம்.ஜி.ஆர் சிலைக்கு மாலை அணிவித்துத் தனது தேர்தல் பிரச்சாரத்தை முறைப்படி தொடங்கினார் ராஜசேகரன். இந்த நிகழ்வில் முன்னாள் அமைச்சர் வெல்லமண்டி நடராஜன், முன்னாள் எம்.பி. ரத்தினவேல் மற்றும் அதிமுக திருச்சி மாநகர் மாவட்டச் செயலாளர் சீனிவாசன் உள்ளிட்ட முக்கிய நிர்வாகிகள் கலந்துகொண்டு அவருக்கு உற்சாக வரவேற்பு அளித்தனர்.
RelatedPosts
ராஜசேகர் என்றாலே பயம்:
இதனைத் தொடர்ந்து செய்தியாளர்களிடம் பேசிய ராஜசேகரன், திமுகவினருக்கு ‘ராஜசேகர்’ என்ற பெயரைக் கேட்டாலே பிடிக்காது என்று கிண்டலாகக் குறிப்பிட்டார். “தற்போது திருச்சி கிழக்கு மற்றும் மேற்கு ஆகிய இரண்டு தொகுதிகளிலும் ராஜசேகர்கள் (அதிமுக மற்றும் தவெக வேட்பாளர்கள்) போட்டியிடுகின்றனர். இது திமுகவுக்குப் பெரும் சவாலாக அமையும்” என்று அவர் தெரிவித்தார்.
அமைச்சர் மீதான விமர்சனம்:
நகராட்சி நிர்வாகத் துறையில் நடைபெற்றுள்ள பணி நியமன முறைகேடுகள் குறித்துச் சுட்டிக்காட்டிய அவர், இந்த விவகாரத்தில் சட்டம் தனது கடமையைச் செய்யும் என்றும், தேர்தலுக்கு முன்னதாகவே அமைச்சர் கே.என்.நேரு சட்ட ரீதியான நடவடிக்கைகளைச் சந்திக்க நேரிடும் என்றும் கூறினார். திருச்சியில் செல்வாக்கு மிக்க அமைச்சருக்கு எதிராக அதிமுக வேட்பாளர் இவ்வளவு வெளிப்படையாகக் குற்றம்சாட்டியிருப்பது தேர்தல் களத்தை இப்போதே சூடாக்கியுள்ளது.
