“தவெகவுடன் கூட்டணி அமைக்க எந்த முயற்சியும் செய்யவில்லை” – அதிமுகவே எங்களின் மூத்த சகோதரர் என அமித் ஷா விளக்கம்!
புதுடெல்லி:
RelatedPosts
தமிழக வெற்றி கழகத்துடன் கூட்டணி அமைக்க பாரதிய ஜனதா கட்சி எந்த முயற்சியும் எடுக்கவில்லை என்று மத்திய உள்துறை அமைச்சர் அமித் ஷா அதிரடியாகத் தெரிவித்துள்ளார். டெல்லியில் தனியார் தொலைக்காட்சி ஒன்றிற்கு அளித்த நேர்காணலில் பேசிய அவர், தமிழக அரசியலில் நிலவும் கூட்டணி குறித்த ஊகங்களுக்கு முற்றுப்புள்ளி வைத்தார். தமிழகத்தில் அதிமுகவுடனான உறவு மிகவும் வலுவாகவும், சகோதரத்துவ அடிப்படையிலும் இருப்பதாக அவர் குறிப்பிட்டார்.
தேசிய ஜனநாயகக் கூட்டணியைப் பொறுத்தவரை, அதிமுக ஒரு மூத்த சகோதரரைப் போலச் செயல்படுவதாகவும், அவர்களுடன் இணைந்து மிக நெருக்கமாகப் பணியாற்றி வருவதாகவும் அமித் ஷா தெரிவித்தார். நடிகர் விஜய்யின் தமிழக வெற்றி கழகத்துடன் எந்தவிதமான கூட்டணிப் பேச்சுவார்த்தையும் நடத்தப்படவில்லை என்று தெளிவுபடுத்திய அவர், ஒருவேளை தவெக தங்கள் கூட்டணிக்கு வந்தால் அது பாஜகவின் வாக்கு வங்கியையே பாதிக்கும் என்றும் கருத்து தெரிவித்தார். மேலும், தமிழகத்தில் தற்போதைய ஆளுங்கட்சிக்கு எதிராகப் பலமான அதிருப்தி அலை வீசுவதாகவும், வரவிருக்கும் தேர்தலில் தேசிய ஜனநாயகக் கூட்டணி அமோக வெற்றி பெறும் என்றும் அவர் நம்பிக்கை தெரிவித்தார்.
