“பேரூர் பட்டீஸ்வரர் கோவில் தேர்த்திருவிழாவைத் தடுக்காதே!” – திமுக அரசுக்கு அண்ணாமலை கடும் கண்டனம்!
கோயம்புத்தூர்:
கோவை மாநகரின் ஆன்மிக அடையாளமான பேரூர் பட்டீஸ்வரர் ஆலயத்தின் பங்குனி உத்திரத் தேர்த்திருவிழாவிற்குத் தமிழக அரசு உடனடியாக அனுமதி வழங்க வேண்டும் என்று பாஜக தேசிய பொதுக்குழு உறுப்பினர் அண்ணாமலை வலியுறுத்தியுள்ளார். இது தொடர்பாக அவர் வெளியிட்டுள்ள சமூக வலைதளப் பதிவில், திமுக அரசின் செயல்பாடுகளைக் கடுமையாகச் சாடியுள்ளார்.
ஆயிரம் ஆண்டுகால மரபு:
அண்ணாமலை தனது அறிக்கையில் குறிப்பிட்டுள்ளதாவது:
RelatedPosts
“ஆயிரம் ஆண்டுகளுக்கும் மேலான பழமை வாய்ந்த கோயம்புத்தூர் பேரூர் பட்டீஸ்வரர் ஆலயத்தின் பங்குனி உத்திரத் தேர்த்திருவிழா என்பது பல நூற்றாண்டுகளாகத் தடையின்றி நடைபெற்று வரும் ஒரு உன்னதமான ஆன்மிக மரபாகும். இந்த ஆண்டு வரும் மார்ச் 29-ஆம் தேதி தேர்த்திருவிழா நடைபெற உள்ள நிலையில், அதற்குத் முட்டுக்கட்டை போடும் வகையில் செய்திகள் வருவது அதிர்ச்சியளிக்கிறது.”
தடையின்மைச் சான்றிதழ் மறுப்பு?
இந்த ஆண்டு தேரோட்டத்திற்கான ஏற்பாடுகள் நடைபெற்று வரும் சூழலில், பொதுப்பணித்துறை (PWD) அதிகாரிகள் தடையின்மைச் சான்றிதழ் (NOC) வழங்க மறுப்பதாகத் தகவல்கள் வெளியாகியுள்ளன. இதைக் குறிப்பிட்டுள்ள அண்ணாமலை, பல நூற்றாண்டுகளாகத் தடையின்றி நடந்த ஒரு விழாவிற்கு இப்போது தடை விதிப்பது பக்தர்களின் மனதைப் புண்படுத்தும் செயல் என்றும், இது வன்மையாகக் கண்டிக்கத்தக்கது என்றும் தெரிவித்துள்ளார்.
திமுக அரசுக்கு விடுக்கப்பட்ட எச்சரிக்கை:
தேர்தல் நெருங்கும் வேளையில், “ஆட்சி முடியும் தருவாயிலும் கூட, இந்து சமய மரபுகளைச் சிதைக்கும் வகையில் திமுக அரசு செயல்படுவது ஏற்றுக்கொள்ள முடியாதது” என்று அவர் விமர்சித்துள்ளார். மேலும், பக்தர்கள் மற்றும் பொதுமக்களின் உணர்வுகளுக்கு மதிப்பளித்து, மார்ச் 29 அன்று நடைபெறவுள்ள தேரோட்டத்திற்குத் தேவையான அனைத்து அனுமதிகளையும் எவ்விதத் தாமதமும் இன்றி வழங்க வேண்டும் என அவர் தமிழக அரசை வலியுறுத்தியுள்ளார்.
