அமெரிக்காவுடன் பேச்சுவார்த்தையா? ஈரான் அதிரடி மறுப்பு – ஹோர்முஸ் நீரிணை விவகாரத்தில் நீடிக்கும் சிக்கல்!
டெஹ்ரான்:
அமெரிக்கா மற்றும் ஈரான் இடையே ஆக்கப்பூர்வமான பேச்சுவார்த்தைகள் நடைபெற்று வருவதாக அமெரிக்க அதிபர் டொனால்ட் டிரம்ப் தெரிவித்த கருத்தை ஈரான் அரசு அதிகாரப்பூர்வமாக மறுத்துள்ளது. இது தொடர்பாக அமெரிக்காவுடன் நேரடியாகவோ அல்லது மறைமுகமாகவோ எந்தவிதப் பேச்சுவார்த்தையும் நடைபெறவில்லை என்று ஈரான் திட்டவட்டமாகத் தெரிவித்துள்ளது.
RelatedPosts
முன்னதாக, ஈரான் உடனான பேச்சுவார்த்தையில் நல்ல முன்னேற்றம் ஏற்பட்டுள்ளதாகவும், அதன் அடிப்படையில் ஈரானின் மின் நிலையங்கள் மற்றும் எரிசக்தி கட்டமைப்புகள் மீது நடத்தத் திட்டமிட்டிருந்த தாக்குதல்களை 5 நாட்களுக்கு ஒத்திவைப்பதாகவும் டிரம்ப் அறிவித்திருந்தார். ஆனால், ஈரானிய ஊடகங்கள் இந்தச் செய்தியை மறுத்துள்ளன. ஈரானின் பாதுகாப்பு மற்றும் இறையாண்மைக்கு முழுமையான சர்வதேச உத்தரவாதம் கிடைக்கும் வரை, உலகின் முக்கிய எண்ணெய் வழித்தடமான ஹோர்முஸ் (Hormuz) நீரிணையைத் திறக்க வாய்ப்பில்லை என்று ஈரான் பாதுகாப்பு கவுன்சில் தெரிவித்துள்ளது.
அமெரிக்காவின் மிரட்டல்களுக்குப் பணியப் போவதில்லை என்றும், தங்கள் நாட்டின் மீது ஏதேனும் தாக்குதல் நடத்தப்பட்டால் பிராந்தியத்தில் உள்ள அமெரிக்க நிலைகள் மற்றும் அதன் நட்பு நாடுகளின் எரிசக்தி கட்டமைப்புகள் மீது கடுமையான பதிலடி கொடுக்கப்படும் என்றும் ஈரான் எச்சரித்துள்ளது. இரு நாடுகளுக்கும் இடையே ஒருபுறம் போர் மேகங்கள் சூழ்ந்துள்ள நிலையில், மறுபுறம் முரண்பட்ட தகவல்கள் வெளியாகி வருவது சர்வதேசச் சந்தையில் கச்சா எண்ணெய் விலையில் பெரும் தாக்கத்தை ஏற்படுத்தியுள்ளது.
