கூட்டணியில் இருந்தாலும் போராடியே தொகுதிகளைப் பெற வேண்டியுள்ளது: விசிக தலைவர் திருமாவளவன் வேதனை
விடுதலை சிறுத்தைகள் கட்சி தொடங்கி 25 ஆண்டுகள் கடந்த பின்னரும், தற்போதும் கூட்டணியில் போராடியே தொகுதிகளைப் பெற வேண்டிய நிலை இருப்பதாக அக்கட்சியின் தலைவர் தொல். திருமாவளவன் தனது வேதனையை வெளிப்படுத்தியுள்ளார். திமுக கூட்டணியில் 10 சட்டமன்றத் தொகுதிகளை விசிக வலியுறுத்தி வரும் நிலையில், திமுக தலைமை 7 இடங்களை மட்டுமே ஒதுக்க முன்வந்துள்ளதாகத் தகவல்கள் வெளியாகியுள்ளன.
இது குறித்து முகநூல் நேரலையில் பேசிய திருமாவளவன், “முன்னிறுத்தும் அரசியலைத் தக்கவைப்பதற்காகவே நாங்கள் கூட்டணியில் இணைந்திருக்கிறோம்” என்று குறிப்பிட்டார். 10-க்கும் குறைவான மிகச் சொற்பமான இடங்கள் ஒதுக்கப்படும்போது, கட்சியில் நீண்டகாலமாகப் பணியாற்றி வாய்ப்புக்காகக் காத்திருப்பவர்களின் பட்டியலைச் சமாளிப்பதில் பெரும் சவால்கள் இருப்பதாக அவர் தெரிவித்தார். இதன் காரணமாகவே, வேட்பாளர் நேர்காணலைத் திட்டமிட்டபடி நடத்த முடியாத சூழல் ஏற்பட்டுள்ளதாகவும் அவர் கூறினார்.
தொகுதிப் பங்கீட்டில் ஏற்பட்டுள்ள இந்த இழுபறியால் விசிக மற்றும் மார்க்சிஸ்ட் கம்யூனிஸ்ட் ஆகிய கூட்டணிக் கட்சிகளிடையே தொடர்ந்து அதிருப்தி நிலவி வருவது தமிழக அரசியல் களத்தில் பரபரப்பை ஏற்படுத்தியுள்ளது.
