பழனி சண்முக நதி கரையில் மலைபோல் குவியும் குப்பைகள்: சுகாதாரச் சீர்கேட்டால் பக்தர்கள் மற்றும் பொதுமக்கள் அவதி!
பழனி:
திண்டுக்கல் மாவட்டம் பழனியில் உள்ள புகழ்பெற்ற சண்முக நதியின் கரையோரம் மலைபோல் தேங்கிக் கிடக்கும் குப்பைகளால் கடும் சுற்றுச்சூழல் பாதிப்பு ஏற்பட்டுள்ளது. அறுபடை வீடுகளில் ஒன்றான பழனி முருகன் கோயிலுக்கு வரும் ஆயிரக்கணக்கான பக்தர்கள் புனித நீராடும் முக்கிய இடமாக விளங்கும் இந்த நதிக்கரை, தற்போது குப்பை மேடாக மாறியிருப்பது பக்தர்களிடையே அதிர்ச்சியை ஏற்படுத்தியுள்ளது.
குப்பைகளால் ஏற்படும் பாதிப்புகள்:
அ.கலையமுத்தூர் ஊராட்சிப் பகுதிகளில் சேகரிக்கப்படும் குப்பைகள் முறையான மேலாண்மை இன்றி சண்முக நதியின் கரையோரங்களில் கொட்டப்படுவதாகப் புகார்கள் எழுந்துள்ளன. குறிப்பாக, அங்கு கொட்டப்படும் இறைச்சிக் கழிவுகளால் தெருநாய்களின் தொல்லை அதிகரித்து, அந்த வழியாகச் செல்லும் வாகன ஓட்டிகள் மற்றும் பாதசாரிகளுக்குப் பெரும் இடையூறு ஏற்பட்டுள்ளது.
நச்சுப் புகை மண்டலம்:
தேங்கிக் கிடக்கும் குப்பைகள் அவ்வப்போது தீயிட்டு எரிக்கப்படுவதால், அப்பகுதி முழுவதும் நச்சுப் புகை சூழ்ந்து காணப்படுகிறது. இதனால் வாகன ஓட்டிகள் மற்றும் பொதுமக்கள் கடும் சுவாசக் கோளாறுகளுக்கு ஆளாகி அவதிப்பட்டு வருகின்றனர். புனிதமான நதிக்கரையில் நிலவும் இந்த அவலநிலையைச் சீரமைக்க அதிகாரிகள் உடனடியாக நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.
