கோடநாடு வழக்கு: “ஏன் இவ்வளவு தாமதம்?” – அதிகாரிகளிடம் நீதிபதி சரமாரி கேள்வி!
பரபரப்பான கோடநாடு கொலை மற்றும் கொள்ளை வழக்கு, உதகை மாவட்ட நீதிமன்றத்தில் நீதிபதி முரளிதரன் முன்னிலையில் இன்று மீண்டும் விசாரணைக்கு வந்தது. இந்த விசாரணையின் போது, வழக்கின் முக்கியக் குற்றவாளியாகக் கருதப்படும் கேரளாவைச் சேர்ந்த வாளையார் மனோஜ் நேரில் ஆஜரானார்.
வழக்கின் போக்கு குறித்து அதிருப்தி வெளியிட்ட நீதிபதி, “இந்த வழக்கு எதற்காக இன்னும் நிலுவையில் உள்ளது?” எனப் புலன் விசாரணை அதிகாரியிடம் சரமாரி கேள்விகளை எழுப்பினார். இதற்குப் பதிலளித்த அதிகாரிகள், இதுவரை இந்த விவகாரத்தில் 269 சாட்சிகளிடம் விரிவான விசாரணை நடத்தப்பட்டுள்ளதாகத் தெரிவித்தனர். மேலும், வழக்கின் முக்கிய ஆதாரங்களாகக் கருதப்படும் பொருட்கள் குஜராத்தில் உள்ள தடயவியல் ஆய்வகத்திற்கு அனுப்பப்பட்டுள்ளதாகவும், அங்கிருந்து இன்னும் தடயவியல் முடிவுகள் வர வேண்டியுள்ளதே தாமதத்திற்குக் காரணம் என்றும் விளக்கமளித்தனர்.
அதிகாரிகளின் விளக்கத்தைப் பதிவு செய்துகொண்ட நீதிபதி முரளிதரன், வழக்கின் அடுத்தகட்ட விசாரணையை ஏப்ரல் 24-ஆம் தேதிக்கு ஒத்திவைத்து உத்தரவிட்டார். பல ஆண்டுகளாகத் தொடர்ந்து வரும் இந்த வழக்கின் விசாரணை தற்போது வேகம் எடுத்துள்ளதால், அடுத்த விசாரணையின் போது முக்கியத் தகவல்கள் வெளியாகலாம் என எதிர்பார்க்கப்படுகிறது.
