“தனிப்பட்ட வாழ்க்கை பற்றிப் பேச விரும்பவில்லை” – விஜய் விவகாரத்தில் அண்ணாமலையின் முதிர்ச்சியான பதில்!
சென்னை: நடிகர் மற்றும் தமிழக வெற்றிக் கழகத்தின் தலைவர் விஜய், அவரது மனைவி சங்கீதாவிடமிருந்து விவாகரத்து கோரி நீதிமன்றத்தில் மனு தாக்கல் செய்யப்பட்டுள்ள விவகாரம் தமிழக அரசியலில் பெரும் பரபரப்பை ஏற்படுத்தியுள்ளது. இது குறித்துச் சென்னை ராயபுரத்தில் செய்தியாளர்கள் எழுப்பிய கேள்விக்குத் தமிழக பாஜக தலைவர் அண்ணாமலை அவர்கள் மிகவும் நிதானமான முறையில் பதிலளித்துள்ளார்.
செய்தியாளர்களிடம் பேசிய அண்ணாமலை, “விஜய் அவர்களின் அரசியல் பயணம், கொள்கைகள் மற்றும் திட்டங்கள் குறித்துக் கேள்வி எழுப்பினால் அதற்குப் பதில் சொல்ல நான் எப்போதும் தயாராக இருக்கிறேன். ஆனால், ஒருவருடைய தனிப்பட்ட வாழ்க்கை (Personal Life) குறித்துக் கருத்து கூற நான் விரும்பவில்லை” என்று திட்டவட்டமாகத் தெரிவித்தார்.
மேலும், அரசியல் சூழல் குறித்துப் பேசிய அவர், “ஒருவர் பொது வாழ்க்கைக்கு அல்லது அரசியலுக்கு வந்துவிட்டால், அது எரியும் தீப்பந்தத்திற்குள் மனிதன் சென்று வருவது போலத்தான் இருக்கும். அரசியலுக்கு வந்துவிட்டால், இதுவரை தோண்டப்படாத தனிப்பட்ட விஷயங்கள் கூடத் தோண்டப்படும் என்பது யதார்த்தம். விஜய் அவர்கள் அரசியலுக்கு வரும்போதே இந்தச் சவால்களை எல்லாம் உணர்ந்துதான் வந்திருப்பார் என்று நான் நம்புகிறேன்” என்று குறிப்பிட்டார். தனிப்பட்ட விமர்சனங்களைத் தவிர்த்து, அரசியல் ரீதியான விவாதங்களுக்கு மட்டுமே முக்கியத்துவம் அளிப்பதாக அண்ணாமலையின் இந்தப் பேச்சு அமைந்திருந்தது.
