தேனி: ஆரம்ப சுகாதார நிலையத்தில் மருத்துவர்கள் இன்றி மக்கள் தவிப்பு – நாய் கடித்த சிறுவனுக்குச் சிகிச்சை அளிக்காத அவலம்!
தேனி: தேனி மாவட்டம் கடமலைக்குண்டு அரசு ஆரம்ப சுகாதார நிலையத்தில், உரிய நேரத்தில் சிகிச்சை அளிக்க மருத்துவர்கள் இல்லாததால் பொதுமக்கள் கடும் அவதிக்குள்ளாகி வருகின்றனர். இந்தப் பகுதியில் உள்ள ஆரம்ப சுகாதார நிலையத்தில் போதிய மருத்துவர்கள் நியமிக்கப்படவில்லை என்றும், இருக்கும் மருத்துவர்களும் முறையாகப் பணிக்கு வருவதில்லை என்றும் நீண்டகாலமாகப் புகார்கள் எழுந்து வருகின்றன.
இந்த நிலையில், இன்று நாய் கடியால் பலத்த காயமடைந்த சிறுவன் ஒருவனை அவசர சிகிச்சைக்காக அவனது உறவினர்கள் இந்தச் சுகாதார நிலையத்திற்கு அழைத்து வந்தனர். ஆனால், அங்குச் சிகிச்சை அளிக்க மருத்துவர்கள் எவரும் இல்லாததைக் கண்டு அவர்கள் அதிர்ச்சியடைந்தனர். இதனால் ஆத்திரமடைந்த உறவினர்கள், அங்கிருந்த மருத்துவப் பணியாளர்களிடம் கடும் வாக்குவாதத்தில் ஈடுபட்டனர். அவசர காலங்களில் கூட மருத்துவர்கள் இல்லாதது இப்பகுதி மக்களிடையே பெரும் கொந்தளிப்பை ஏற்படுத்தியுள்ளது. மாவட்ட நிர்வாகம் உடனடியாக தலையிட்டு நிரந்தர மருத்துவர்களை நியமிக்க வேண்டும் எனப் பொதுமக்கள் கோரிக்கை விடுத்துள்ளனர்.
