“தமிழக தேர்தல் நாட்டுக்கே முன்னுதாரணமாக இருக்கும்” – தலைமைத் தேர்தல் ஆணையர் ஞானேஷ்குமார் பேட்டி!
சென்னை: தமிழகத்தில் விரைவில் நடைபெறவுள்ள சட்டமன்றத் தேர்தலுக்கான முன்னேற்பாடுகள் குறித்து ஆய்வு செய்ய வந்த இந்தியத் தலைமைத் தேர்தல் ஆணையர் ஞானேஷ்குமார், சென்னையில் செய்தியாளர்களைச் சந்தித்தார். அப்போது பேசிய அவர், “இந்த முறை தமிழகத் தேர்தல் இதற்கு முன்பு நடந்த தேர்தல்களை விட முற்றிலும் மாறுபட்டதாகவும், வித்தியாசமானதாகவும் இருக்கும்” என்று தெரிவித்தார். தேர்தலை மிகுந்த வெளிப்படைத்தன்மையுடன் நடத்தி, ஒட்டுமொத்த நாட்டுக்கே தமிழகம் முன்னுதாரணமாகத் திகழும் வகையில் நடவடிக்கைகள் எடுக்கப்பட்டு வருவதாக அவர் குறிப்பிட்டார்.
தேர்தல் நடைமுறைகளில் கொண்டு வரப்பட்டுள்ள மாற்றங்கள் குறித்து விளக்கிய அவர், வாக்குப்பதிவு நாளன்று பொதுமக்கள் எளிதில் அறிந்துகொள்ளும் வகையில், இரண்டு மணி நேரத்திற்கு ஒருமுறை வாக்குப்பதிவு சதவீதம் இணையதளத்தில் உடனுக்குடன் பதிவேற்றம் செய்யப்படும் என்றார். மேலும், வாக்கு எண்ணிக்கையின்போது வெளிப்படைத்தன்மையை உறுதி செய்ய, கடைசி இரண்டு சுற்றுகள் மீதமிருக்கும் போதே தபால் வாக்குகள் எண்ணி முடிக்கப்படும் என்றும் தெரிவித்தார். இளைய தலைமுறையினர் அதிக அளவில் பங்கேற்கும் வகையில் இந்தத் தேர்தல் ஒரு ஜனநாயகத் திருவிழாவாக அமையும் என அவர் நம்பிக்கை தெரிவித்தார்.
