உலக நன்மைக்காக சிறப்பு யாகம்: பழனி புலிப்பாணி சித்தர் ஆசிரமத்தில் ஜப்பானிய பக்தர்கள் பால்குடம் எடுத்து வழிபாடு!
பழனி: திண்டுக்கல் மாவட்டம் பழனியில் உள்ள புகழ்பெற்ற புலிப்பாணி சித்தர் ஆசிரமத்தில், உலக நன்மை வேண்டி நடைபெற்ற சிறப்பு யாகத்தில் ஜப்பான் நாட்டைச் சேர்ந்த ஏராளமான பக்தர்கள் கலந்துகொண்டு பக்திப் பரவசத்துடன் வழிபாடு நடத்தினர்.
பழனி மலையடிவாரத்தில் அமைந்துள்ள புலிப்பாணி சித்தர் ஜீவசமாதியில் இந்த விசேஷ யாகம் நடைபெற்றது. ஜப்பானிய தொழிலதிபர் கோபால் பிள்ளை சுப்பிரமணியம் தலைமையில் நடைபெற்ற இந்த ஆன்மீக நிகழ்வில், ஜப்பானைச் சேர்ந்த பல ஆண்கள் மற்றும் பெண்கள் பாரம்பரிய முறைப்படி பங்கேற்று சுவாமி தரிசனம் செய்தனர்.
யாகம் நிறைவடைந்ததைத் தொடர்ந்து, ஜப்பானிய பக்தர்கள் தங்கள் நேர்த்திக்கடனை செலுத்தும் விதமாகப் பால்குடங்களைச் சுமந்து ஊர்வலமாகச் சென்றனர். மொழி மற்றும் தேச எல்லைகளைக் கடந்து, தமிழர்களின் சித்தரியல் மரபு மற்றும் ஆன்மீகச் சடங்குகளில் வெளிநாட்டினர் ஆர்வத்துடன் பங்கேற்ற இந்த நிகழ்வு பழனிக்கு வந்திருந்த பக்தர்களிடையே பெரும் ஆச்சரியத்தையும் நெகிழ்ச்சியையும் ஏற்படுத்தியது.
