தமிழக சட்டப்பேரவைத் தேர்தல் 2026: அங்கீகரிக்கப்பட்ட அரசியல் கட்சிகளுடன் தேர்தல் ஆணையம் தீவிர ஆலோசனை!
தமிழகம் மற்றும் புதுச்சேரி உட்பட 5 மாநிலங்களில் சட்டப்பேரவைத் தேர்தல் விரைவில் நடைபெற உள்ளது. இதனை முன்னிட்டு, தேர்தல் தயார்நிலை குறித்து ஆய்வு செய்வதற்காக இந்தியத் தலைமைத் தேர்தல் ஆணையர் ஞானேஷ்குமார் தலைமையிலான உயர்மட்டக் குழுவினர் சென்னைக்கு வருகை தந்துள்ளனர். இந்தப் பயணத்தின் ஒரு பகுதியாக, இன்று சென்னையில் அங்கீகரிக்கப்பட்ட அரசியல் கட்சிகளின் பிரதிநிதிகளுடன் அவர்கள் விரிவான ஆலோசனையை மேற்கொண்டனர்.
இந்தக் கூட்டத்தில் பாஜக, அதிமுக, திமுக, காங்கிரஸ் உள்ளிட்ட முக்கிய அரசியல் கட்சிகளின் பிரதிநிதிகள் பங்கேற்றுத் தங்களது கோரிக்கைகளை முன்வைத்தனர். குறிப்பாக, ஒரே கட்டமாகத் தேர்தல் நடத்துவது, தேர்தல் நடத்தை விதிமுறைகளைத் தீவிரமாக அமல்படுத்துவது, மற்றும் பாதுகாப்பு ஏற்பாடுகளைப் பலப்படுத்துவது குறித்து விவாதிக்கப்பட்டது.
அரசியல் கட்சிகளுடனான ஆலோசனையைத் தொடர்ந்து, தேர்தல் ஆணையக் குழுவினர் மாவட்ட ஆட்சியர்கள், காவல்துறை உயர் அதிகாரிகள் மற்றும் தலைமைச் செயலாளருடன் ஆலோசனை நடத்த உள்ளனர். தேர்தல் தேதிகள் அறிவிக்கப்படுவதற்கு முன்பாக நடைபெறும் இந்த முக்கியமான சந்திப்பு, தமிழக அரசியல் களத்தில் பெரும் எதிர்பார்ப்பை ஏற்படுத்தியுள்ளது.
