பாமக செயல் தலைவராக காந்திமதியை நியமித்தார் ராமதாஸ்
பாமக நிறுவனர் டாக்டர் ராமதாஸ், தனது மூத்த மகள் காந்திமதியை (ஸ்ரீகாந்தி எனவும் அழைக்கப்படுகிறார்) கட்சியின் செயல் தலைவராக நியமித்து உத்தியோகபூர்வ அறிவிப்பை வெளியிட்டுள்ளார்.
கடந்த ஆண்டு டிசம்பர் மாதத்தில் நடைபெற்ற பொதுக்குழுக் கூட்டத்தில், ராமதாஸ் தனது பேரன் முகுந்தனை பாமக இளைஞர் அணி தலைவராக அறிவித்தார். அந்த அறிவிப்புக்கு எதிராக அன்புமணி ராமதாஸ் மேடையிலேயே கடுமையாக எதிர்ப்பு தெரிவித்திருந்தார். அந்த நாளில் உருவான குடும்ப அரசியல் விரிசல் இதுவரையும் சரியாக முடியவில்லை.
அதன்பிறகு சில மாதங்களாக, ராமதாஸ் ஊடகங்கள் முன்பு அன்புமணியை நேரடியாக விமர்சித்து வருகிறார். இதே நேரத்தில் இருவரும் கட்சியில் பல நிர்வாகிகளை மாற்றியும், நியமித்தும் அறிவித்து வருகின்றனர். இதனால் ஏற்பட்ட உட்கட்சித் தகராறில், சமீபத்தில் ராமதாஸ், அன்புமணியை தலைவர் பதவியில் இருந்து நீக்கி உத்தரவிட்டிருந்தார்.
இந்த நிலையில்தான் தருமபுரியில் பாமக பொதுக்குழுக் கூட்டம் இன்று (அக்டோபர் 25) நடைபெற்றது. அக்கூட்டத்தில் செய்தியாளர்களை சந்தித்த ராமதாஸ் கூறியதாவது:
“பாமக செயல் தலைவராக என் மூத்த மகள் காந்திமதியை நியமித்துள்ளேன். அதே நேரத்தில், இளைஞர் சங்க மாநிலத் தலைவராக தமிழ் குமரனை நியமிக்கிறேன். அவர் தமிழகத்துக்கு பெருமை சேர்ப்பார் என நம்புகிறேன். செயல் தலைவர் என்ற பதவியை நான் உருவாக்கினேன்; எனக்கு அது தேவையில்லை என்றும், அதை ஏற்க விருப்பமில்லையென்றும் ஒருவர் கூறியதால், அந்தப் பொறுப்பை என் மூத்த மகள் ஸ்ரீகாந்திக்கு வழங்குகிறேன்.
ஜி.கே. மணி கட்சிக்கும் மக்களுக்கும் அர்ப்பணிப்புடன் உழைத்தவர். சட்டப்பேரவையில் மக்களின் பிரச்சினைகளை எப்போதும் வலியுறுத்தி பேசுபவர். எனவே அவரை ‘ஓய்வறியா உழைப்பாளர்’ என நாம் கூறுகிறோம்.
தமிழகத்தில் சாதிவாரியாக கணக்கெடுப்பு நடத்தப்பட வேண்டும் — அது நிச்சயம் நடக்கும். 2026 சட்டப்பேரவைத் தேர்தலில் நாம் வெற்றிக் கூட்டணியை அமைப்போம். நாம் இணையும் இடம் தான் வெற்றிக்கான கூட்டணி. காந்திமதி கட்சியை வளர்ப்பார், எனக்கும் பாதுகாப்பாக இருப்பார்,” என்றார்.
புதிய பொறுப்பைப் பெற்ற காந்திமதி இதுகுறித்து பேசியபோது,
“இந்தப் பதவி எனக்கு எதிர்பாராத ஒன்றாக கிடைத்துள்ளது. அப்பாவின் உத்தரவை நான் முழுமையாக நிறைவேற்றுவேன்,” என தெரிவித்தார்.
