ஆட்சியில் பங்கீடு சாத்தியமில்லை – ஸ்டாலின் கருத்துக்கு காங்கிரஸில் எதிரொலி
தமிழகத்தில் ஆட்சிப் பொறுப்பில் பங்கீடு என்ற நடைமுறை பொருந்தாது என முதலமைச்சர் மு.க. ஸ்டாலின் தெளிவாக தெரிவித்ததையடுத்து, காங்கிரஸ் கட்சிக்குள் கருத்து வேறுபாடு எழுந்துள்ளது.
சென்னையில் நடைபெற்ற ‘இந்தியா டுடே’ கருத்தரங்கில் கலந்து கொண்டு உரையாற்றிய முதலமைச்சர், 2021 சட்டமன்றத் தேர்தலைவிட வரவிருக்கும் தேர்தல் கடினமாக இருக்காது என்றும், திமுக அரசின் சாதனைகளை மக்களிடம் கொண்டு சென்று வெற்றியைப் பெறுவோம் என்றும் நம்பிக்கை தெரிவித்தார்.
தமிழகத்தில் எந்த கூட்டணியும் உருவானாலும், திமுக தலைமையிலான கூட்டணியே வெற்றி பெறும் என்றும், கூட்டணிக்குள் குழப்பம் உள்ளது என்ற செய்திகள் திட்டமிட்டு பரப்பப்படுகின்றன என்றும் அவர் கூறினார்.
திமுக–காங்கிரஸ் உறவில் எந்த சிக்கலும் இல்லை என வலியுறுத்திய அவர், கூட்டணியில் பிளவு ஏற்படும் என்ற எதிர்பார்ப்பு பலிக்காது என்றும் தெரிவித்தார். இரு கட்சிகளும் இணக்கமாக செயல்பட்டு வருவதாகவும், கூட்டணி தொடரும் என்றும் குறிப்பிட்டார்.
RelatedPosts
மேலும், தமிழக அரசியல் சூழலில் அதிகாரப் பங்கீடு நடைமுறைக்கு ஏற்றதல்ல எனவும் அவர் தெரிவித்தார்.
இதற்கிடையில், முதலமைச்சரின் கருத்துக்கு பதிலளிக்கும் வகையில் காங்கிரஸ் நாடாளுமன்ற உறுப்பினர் மாணிக்கம் தாகூர் சமூக ஊடகத்தில் பதிவு ஒன்றை வெளியிட்டுள்ளார். அதில், கூட்டணி அரசு அமைக்கப்பட வேண்டுமா அல்லது தனிக்கட்சி ஆட்சி வர வேண்டுமா என்பதை இறுதியில் மக்கள் தீர்மானிப்பார்கள் என தெரிவித்துள்ளார்.
மேலும், 2006ஆம் ஆண்டு மக்களின் தீர்ப்பை முழுமையாக செயல்படுத்தாதது காங்கிரசின் தவறாக இருந்ததாகவும் அவர் குறிப்பிட்டுள்ளார். இதன் மூலம், 2006இல் திமுக குறைந்தபட்ச அரசு அமைத்தபோது காங்கிரஸ் ஆதரவு அளித்த சம்பவத்தை மறைமுகமாக சுட்டிக்காட்டியுள்ளார்.
