மதுரை மாநகராட்சி சொத்து வரி முறைகேடு – கைது செய்யப்பட்ட தற்காலிக பணியாளர்களுக்கு ஜாமின் மறுப்பு
மதுரை மாநகராட்சியில் நடந்த சொத்து வரி முறைகேடு தொடர்பான வழக்கில் கைது செய்யப்பட்ட இரண்டு தற்காலிக ஊழியர்களின் ஜாமின் மனுக்களை மாவட்ட நீதிமன்றம் நிராகரித்துள்ளது.
2022 முதல் 2024 வரையிலான காலகட்டத்தில், மாநகராட்சிக்கு உட்பட்ட 150-க்கும் அதிகமான கட்டடங்களுக்கு விதிக்க வேண்டிய சொத்து வரி விதிமுறைகளை மீறி குறைத்ததாகவும், இதன் மூலம் அரசுக்கு பல கோடி ரூபாய் வருவாய் இழப்பு ஏற்பட்டதாகவும் புகார்கள் எழுந்தன.
இந்த விவகாரம் குறித்து மாநகராட்சி மேயர் தினேஷ் குமார் மத்திய குற்றப்பிரிவு காவல் துறையினரிடம் புகார் அளித்ததை தொடர்ந்து, வழக்கு பதிவு செய்யப்பட்டு விசாரணை நடைபெற்று வருகிறது.
இந்த வழக்கின் அடிப்படையில் கைது செய்யப்பட்ட தற்காலிக பணியாளர்களான பழனிகுமார் மற்றும் ஜெயபிரியா ஆகியோர், தங்களுக்கு ஜாமின் வழங்கக் கோரி மாவட்ட நீதிமன்றத்தில் மனுக்கள் தாக்கல் செய்தனர்.
இந்த மனுக்கள் விசாரணைக்கு வந்தபோது, அரசு தரப்பில் இருந்து ஜாமின் வழங்குவதற்கு கடும் எதிர்ப்பு முன்வைக்கப்பட்டது. இரு தரப்பு வாதங்களையும் கேட்ட நீதிபதி, வழக்கு விசாரணை இன்னும் ஆரம்ப நிலையில் உள்ளதால் ஜாமின் வழங்க இயலாது எனத் தெரிவித்துக் கொண்டு, மனுக்களைத் தள்ளுபடி செய்தார்.
