கல் குவாரி முறைகேடுகளில் திமுக அரசு உடந்தை – அண்ணாமலை குற்றச்சாட்டு
கல் குவாரி முறைகேடுகளில் திமுக தலைமையிலான மாநில அரசு நேரடியாக உடந்தையாக செயல்பட்டு வருவதாக பாஜக தேசிய பொதுக்குழு உறுப்பினர் அண்ணாமலை கடுமையாக குற்றம்சாட்டியுள்ளார்.
இது தொடர்பாக அவர் வெளியிட்டுள்ள அறிக்கையில், நாட்டின் எல்லைகளை பாதுகாக்கும் பொறுப்பு வகிக்கும் ராணுவ வீரர்கள், தங்கள் சொந்த ஊர்களை கொள்ளையிலிருந்து காப்பாற்றுவதற்காக விடுப்பு எடுக்க வேண்டிய சூழ்நிலை உருவாகி இருப்பது, திமுக ஆட்சியின் நிர்வாக தோல்வியை வெளிப்படுத்தும் மிகக் கடுமையான குற்றச்சாட்டாகும் என தெரிவித்துள்ளார்.
RelatedPosts
மேலும், அந்த வீரர்கள் வசிக்கும் கிராமங்களில் உள்ள அய்யனார் மற்றும் பெருமாள் கோயில்களுக்கு சொந்தமான நிலங்களும், பட்டியல் சமூக மக்களுக்கு வழங்கப்பட்ட பஞ்சமி நிலங்களும், திட்டமிட்டு கல் குவாரி பயன்பாட்டிற்காக அபகரிக்கப்பட்டுள்ளதாகவும் அவர் குறிப்பிட்டுள்ளார்.
இந்த வகையான கொள்ளைச் சம்பவங்கள் தமிழ்நாடு முழுவதும் நடைபெற்று வரும் நிலையில், திமுக அரசு இதனைத் தடுக்க எந்த நடவடிக்கையும் எடுக்காமல் மௌனமாக இருப்பதாக அண்ணாமலை விமர்சித்துள்ளார்.
மேலும், அமலாக்கத் துறை ஏற்கனவே தமிழ்நாடு முழுவதும் நடைபெறும் சட்டவிரோத மணல் கொள்ளைகள் குறித்து சுட்டிக்காட்டியுள்ளதாகவும், அதேபோல் மாநிலம் முழுவதும் நடைபெறும் சட்டவிரோத கல் குவாரி செயல்பாடுகள் குறித்தும் தொடர்ந்து எச்சரித்து வருவதாகவும் அவர் தெரிவித்துள்ளார்.
இவ்வாறான எச்சரிக்கைகள் இருந்தபோதும், திமுக தலைமையிலான மாநில அரசு திட்டமிட்ட அலட்சியத்துடன் எந்தவிதமான நடவடிக்கையும் எடுக்காமல் இருப்பதாகவும், இதன் மூலம் கொள்ளையர்களுக்கு மறைமுக ஆதரவு வழங்கி வருவதாகவும் அண்ணாமலை குற்றம்சாட்டியுள்ளார்.
