நானும் தினகரனும் ஜெயலலிதா வளர்த்த அரசியல் பிள்ளைகள் – எடப்பாடி பழனிசாமி
மதுராந்தகத்தில் நடைபெற்ற தேசிய ஜனநாயகக் கூட்டணியின் பொதுக்கூட்டத்தில் உரையாற்றிய அதிமுக பொதுச் செயலாளர் எடப்பாடி பழனிசாமி (EPS), வரவிருக்கும் 2026 சட்டமன்றத் தேர்தல், ஊழல்களால் மூழ்கிய குடும்ப அரசியலுக்கு முற்றுப்புள்ளி வைக்கும் தேர்தலாக அமையும் எனக் கூறினார்.
2026 சட்டமன்றத் தேர்தலில் தேசிய ஜனநாயக கூட்டணி 210 தொகுதிகளில் வெற்றி பெற்று, தமிழகத்தில் ஆட்சி அமைப்பது உறுதி எனத் தெளிவாக தெரிவித்த அவர், கடந்த ஐந்து ஆண்டுகால திமுக ஆட்சியில் மக்கள் நிம்மதியின்றி வேதனையே அனுபவித்துள்ளனர் என்றும் குற்றம்சாட்டினார்.
தொடர்ந்து பேசிய அவர், தானும் அமமுக பொதுச் செயலாளர் டிடிவி தினகரனும் ஜெயலலிதா வழியில் உருவான அரசியல் பிள்ளைகள் எனக் குறிப்பிட்டார். இந்தியா முழுவதும் இன்று மதுராந்தகத்தை நோக்கி அரசியல் எதிர்பார்ப்புடன் பார்வை திரும்பியுள்ளது என்றும் அவர் கூறினார்.
டிடிவி தினகரனுடன் இருந்த கருத்து வேறுபாடுகள் அனைத்தும் இப்போது முடிவுக்கு வந்துவிட்டதாக தெரிவித்த எடப்பாடி பழனிசாமி, திமுக ஆட்சியை அகற்ற வேண்டும் என்பதே தேசிய ஜனநாயக கூட்டணியில் இணைந்ததற்கான முதன்மை நோக்கம் என விளக்கினார்.
மேலும், பிரதமர் நரேந்திர மோடி இந்த மண்ணில் காலடி வைத்த உடனே “சூரியன் மறைந்தது” என விமர்சனமாகக் குறிப்பிட்ட அவர், திமுகவில் உழைத்த பலருக்கும் உரிய மரியாதை கிடைப்பதில்லை என்றும், எந்த அரசியல் தகுதியும் இல்லாத உதயநிதி ஸ்டாலினுக்கு துணை முதல்வர் பதவி வழங்கப்பட்டது என கடுமையாக விமர்சித்தார்.
வரவிருக்கும் சட்டமன்றத் தேர்தலில் தேசிய ஜனநாயக கூட்டணி பெரும்பான்மையான தொகுதிகளில் வெற்றி பெறும் என நம்பிக்கை தெரிவித்த அவர், இந்தத் தேர்தல் ஊழல் நிறைந்த திமுக ஆட்சிக்கு முடிவுகட்டும் தீர்மானக் களமாக இருக்கும் என்றும் கூறினார்.
