வாக்குறுதி நிறைவேற்றக் கோரியவர்கள்மீது கைது: திமுக அரசுக்கு அண்ணாமலை கண்டனம்
தேர்தலில் அளித்த உறுதிமொழிகளை செயல்படுத்த வேண்டும் என்று கேட்பவர்கள்மீது திமுக அரசு கைது நடவடிக்கைகளை மேற்கொண்டு வருவதாக பாஜக தேசிய பொதுக்குழு உறுப்பினர் அண்ணாமலை கடுமையாக விமர்சித்துள்ளார்.
தமிழகத்தில் அரசு பள்ளிகளில் மதிய உணவுத் திட்டத்தில் பணியாற்றும் 65,000க்கும் மேற்பட்ட ஊழியர்களுக்கு பணியிட பாதுகாப்பும், உரிய ஓய்வூதியமும் வழங்கப்படும் என திமுக தேர்தல் காலத்தில் உறுதியளித்ததாக அவர் குறிப்பிட்டார். ஆனால் ஆட்சி அமைந்து ஐந்து ஆண்டுகள் கடந்தும் அந்த வாக்குறுதி நடைமுறைப்படுத்தப்படாததால், நாளை முதல் வேலை நிறுத்த போராட்டத்தில் ஈடுபடப் போவதாக சத்துணவு திட்ட ஊழியர்கள் அறிவித்துள்ளதாகவும் தெரிவித்தார்.
இந்த வேலை நிறுத்தத்தால் பள்ளி மாணவர்கள் கடுமையாக பாதிக்கப்படுவார்கள். எப்படியாவது ஆட்சியைப் பிடிக்க வேண்டும் என்ற நோக்கில் திமுக வெளியிட்ட எண்ணற்ற போலி வாக்குறுதிகளில் இதுவும் ஒன்றாகும். அதன் விளைவாக, மாணவர்களின் பசியை போக்கும் சத்துணவு ஊழியர்களே இன்று பாதிக்கப்பட்டுள்ளதாக அண்ணாமலை கூறினார்.
மக்களை ஏமாற்றும் பொய்யான வாக்குறுதிகளை அளித்துவிட்டு, அதையே நிறைவேற்றுமாறு கேட்பவர்கள்மீது கைது எனும் அடக்குமுறையை திமுக அரசு கையாண்டு வருவதாகவும் அவர் சாடினார்.
மனசாட்சியே இல்லாமல் மீண்டும் மேடை அமைத்து மக்களை தவறாக வழிநடத்த முதலமைச்சர் ஸ்டாலின் முயற்சி செய்து வருகிறார் என்றும், சத்துணவு ஊழியர்கள் வேலை நிறுத்தத்தில் ஈடுபட்டால் மாணவர்களின் கல்வியும் உணவும் பாதிக்கப்படும் என்பதே திமுகவுக்கு புரியவில்லையா என்றும் அவர் கேள்வி எழுப்பினார்.
நீங்கள் அளித்த வாக்குறுதியையே ஊழியர்கள் கேட்கிறார்கள். அவர்களுடன் உரிய பேச்சுவார்த்தை நடத்தி, நியாயமான கோரிக்கைகளை நிறைவேற்ற நேரமில்லாத அரசு, எந்த அடிப்படையில் நாள்தோறும் சதவீத கணக்கில் வாக்குறுதிகள் நிறைவேற்றப்பட்டதாக கூறுகிறது என்று அண்ணாமலை கடும் கேள்வி எழுப்பியுள்ளார்.
