அவனியாபுரம் ஜல்லிக்கட்டு போட்டி – பரபரப்புடன் தொடரும் பாரம்பரிய வீரத் திருவிழா
அவனியாபுரத்தில் நடைபெற்று வரும் ஜல்லிக்கட்டு போட்டி மிகுந்த பரபரப்பும் உற்சாகமும் நிறைந்ததாக நடந்து வருகிறது.
களத்தில் சீறிப்பாயும் காளைகள், அவற்றை தைரியமாக எதிர்கொண்டு கட்டுப்படுத்தும் மாடுபிடி வீரர்கள் என போட்டி முழுவதும் சுவாரசியம் காணப்படுகிறது.
இதுவரை நடைபெற்ற 8 சுற்றுகளின் முடிவில், 701 காளைகள் வாடிவாசல் வழியாக களமிறக்கப்பட்டுள்ளன. இதில் 167 காளைகள் வெற்றிகரமாக பிடிபட்டுள்ளதாக அதிகாரப்பூர்வ தகவல்கள் தெரிவிக்கின்றன.
9வது சுற்றில் பச்சை நிற டி-ஷர்ட் அணிந்த மாடுபிடி வீரர்கள் களமிறங்கி போட்டியை மேலும் சூடுபடுத்தினர்.
போட்டியில் முதலிடம் பெறும் வீரருக்கு ரூ.8 லட்சம் மதிப்பிலான கார் பரிசாக வழங்கப்பட உள்ளது. வீரர்கள் போட்டிப் போட்டுக் காளைகளை அடக்கி, பல்வேறு பரிசுப் பொருட்களை கைப்பற்றி வருகின்றனர்.
மேலும், சிறந்த காளைக்கான பரிசாக ரூ.11 லட்சம் மதிப்புள்ள டிராக்டர் வழங்க ஏற்பாடு செய்யப்பட்டுள்ளது.
இந்நிலையில், ஜல்லிக்கட்டு போட்டியின் போது காளைகள் முட்டியதில் மாடுபிடி வீரர்கள், காளை உரிமையாளர்கள் உள்ளிட்ட மொத்தம் 48 பேர் காயமடைந்துள்ளதாக தெரிவிக்கப்பட்டுள்ளது.
