தவெக தலைவர் விஜயை குறிவைத்து அழுத்தம் கொடுக்க தேவையில்லை – பாஜக மாநிலத் தலைவர் நயினார் நாகேந்திரன்
தேசிய ஜனநாயக கூட்டணிக்கு தவெக தலைவர் விஜயைச் சுற்றி எந்தவிதமான நெருக்கடியையும் உருவாக்க வேண்டிய கட்டாயம் இல்லை என்று பாஜக மாநிலத் தலைவர் நயினார் நாகேந்திரன் தெரிவித்துள்ளார்.
மதுரையில் அமைந்துள்ள அம்மா திடலில், வரும் 23ஆம் தேதி தேசிய ஜனநாயக கூட்டணியின் மாபெரும் பொதுக்கூட்டம் நடைபெற உள்ளது. இதற்கான முன்னேற்பாடுகளை நேரில் ஆய்வு செய்த நயினார் நாகேந்திரன், பின்னர் செய்தியாளர்களிடம் கருத்துகளை பகிர்ந்துகொண்டார்.
அப்போது அவர் பேசுகையில், தற்போதைய திமுக ஆட்சியை மாற்றுவதே தேசிய ஜனநாயக கூட்டணியின் முதன்மை இலக்கு என்றும், நடிகர் விஜய்க்கு எந்தவித அரசியல் அழுத்தத்தையும் வழங்க வேண்டிய அவசியம் தங்களுக்கு இல்லை என்றும் தெளிவுபடுத்தினார்.
மேலும், கடந்த காலத்தில் பராசக்தி திரைப்படம் வெளியான போது, சென்சார் போர்டில் காங்கிரஸ் கட்சியினர் புகார்கள் அளித்ததாக குறிப்பிட்ட அவர், அந்த நடைமுறையைப் போல செயல்படுவது தங்களின் அரசியல் பண்பாடு அல்ல என்றும் கூறினார்.
