பொங்கல் கரும்புக்கான கொள்முதல் தொகையை உயர்த்த வேண்டும் – விவசாயிகள் வேண்டுகோள்
பொங்கல் பண்டிகையை முன்னிட்டு வழங்கப்படும் அரசு பரிசுத் தொகுப்பில் கரும்பு சேர்க்கப்பட்டுள்ள நிலையில், அதற்காக நிர்ணயிக்கப்பட்ட கொள்முதல் விலை போதுமானதாக இல்லை என கூறி, தமிழக அரசு விலையை உயர்த்தி வழங்க வேண்டும் என்று விவசாயிகள் கோரிக்கை விடுத்துள்ளனர்.
அரசின் பொங்கல் தொகுப்புத் திட்டத்திற்காக, விவசாயிகளிடமிருந்து கரும்புகள் நேரடியாக வாங்கப்பட உள்ளதாக அறிவிக்கப்பட்டுள்ளது. இதனைத் தொடர்ந்து, தேனி மாவட்டத்தின் பெரியகுளம், சின்னமனூர், உத்தமபாளையம் உள்ளிட்ட பகுதிகளில் பயிரிடப்பட்ட கரும்புகளை அறுவடை செய்யும் பணிகள் தீவிரமாக நடைபெற்று வருகின்றன.
அரசு தரப்பில், ஒரு முழு கரும்புக்கு ரூ.38 வழங்கப்படும் என தெரிவிக்கப்பட்டுள்ளதாக விவசாயிகள் கூறுகின்றனர். ஆனால், இந்த விலை தற்போதைய செலவுகளுக்கு ஈடாக இல்லை என்றும் அவர்கள் அதிருப்தி தெரிவித்துள்ளனர்.
அறுவடை செய்யும் கூலி, போக்குவரத்து செலவுகள் உள்ளிட்ட கூடுதல் செலவுகளை கருத்தில் கொண்டு, கரும்புக்கான கொள்முதல் விலையை தமிழக அரசு உயர்த்தி நிர்ணயிக்க வேண்டும் என விவசாயிகள் வலியுறுத்தியுள்ளனர்.
