நாம் அதிகமாக நேசிப்பவர்களை காலம் விரைவில் பிரித்துக் கொள்கிறது – ரஜினிகாந்த்
நாம் மனதார நேசிக்கும் மனிதர்களை காலம் மிக விரைவாக நம்மிடமிருந்து பிரித்துக் கொண்டு செல்கிறது என்று நடிகர் ரஜினிகாந்த் உருக்கமாக தெரிவித்துள்ளார்.
ஏவிஎம் நிறுவனத்தின் உரிமையாளரும், தமிழ் சினிமாவின் மூத்த திரைப்பட தயாரிப்பாளருமான ஏவிஎம் சரவணன், வயதுமூப்பு காரணமாக கடந்த டிசம்பர் 4ஆம் தேதி காலமானார்.
அவரின் நினைவாக, சென்னை விருகம்பாக்கத்தில் நினைவேந்தல் நிகழ்ச்சி நடைபெற்றது. இந்த நிகழ்வில் தமிழக முதலமைச்சர் மு.க. ஸ்டாலின், நடிகர்கள் ரஜினிகாந்த், கமல்ஹாசன் (மக்கள் நீதி மய்யம் நிறுவனத் தலைவர்), கவிஞர் வைரமுத்து உள்ளிட்ட பல முக்கிய பிரமுகர்கள் கலந்து கொண்டு மலர்தூவி மரியாதை செலுத்தினர். தொடர்ந்து, ஏவிஎம் சரவணனின் உருவப் படத்தை முதலமைச்சர் ஸ்டாலின் திறந்து வைத்தார்.
நிகழ்ச்சியில் உரையாற்றிய முதலமைச்சர் ஸ்டாலின், ஏவிஎம் சரவணனின் சாதனைகளையும், அவரின் பங்களிப்புகளையும் நினைவுகூர்ந்தார். தமிழ் திரைப்பட வரலாற்றில் ஏவிஎம் நிறுவனத்தை தவிர்த்து பேச முடியாது என்றும், ஏவிஎம் நிறுவனத்துக்கும் முன்னாள் முதல்வர் கருணாநிதிக்கும் நெருங்கிய நட்பு இருந்ததாகவும் அவர் குறிப்பிட்டார்.
அதனைத் தொடர்ந்து பேசிய நடிகர் ரஜினிகாந்த், நாம் மனதார அதிகம் நேசிக்கும் மனிதர்களை காலம் சீக்கிரமே நம்மிடமிருந்து எடுத்துச் சென்று விடுவதாகக் கூறி தனது வேதனையை வெளிப்படுத்தினார். சினிமா துறையில் மட்டுமல்லாமல், தனிப்பட்ட வாழ்க்கையிலும் பலருக்கு உதவிய மனிதராக ஏவிஎம் சரவணன் திகழ்ந்ததாகவும், அவர் ஒரு உண்மையான ஜென்டில்மேன் எனவும் ரஜினி புகழாரம் சூட்டினார்.
மேலும், ஏவிஎம் சரவணனின் அலுவலகத்திற்கு சென்றால் எப்போதும் ஒரு நல்ல நேர்மறை ஆற்றல் உணரப்படும் என்றும் ரஜினிகாந்த் நினைவுகூர்ந்தார்.
