மெரினா கடற்கரை – கடைகள் தொடர்பான வழக்கில் உயர்நீதிமன்றத்தின் முக்கிய உத்தரவு
மெரினா கடற்கரையில், உணவுப் பொருட்கள், பொம்மைகள் மற்றும் அலங்காரப் பொருட்கள் விற்பனை செய்யும் கடைகள் தவிர, பிற வகை வணிகக் கடைகள் எதையும் அமைக்கக் கூடாது என்று சென்னை உயர்நீதிமன்றம் தெளிவான உத்தரவை பிறப்பித்துள்ளது.
மெரினா கடற்கரையில் உள்ள கடைகளின் ஒழுங்குமுறை குறித்து தொடரப்பட்ட வழக்கை விசாரித்த நீதிபதிகள், கடந்த டிசம்பர் 22 ஆம் தேதி நேரடியாக கடற்கரைக்கு சென்று ஆய்வு மேற்கொண்டனர்.
இந்த வழக்கு மீண்டும் விசாரணைக்கு வந்தபோது, தலைவர்களின் நினைவிடங்கள் அமைந்துள்ள பகுதிக்கு பின்னால் உள்ள இடத்தையும் “நீலக்கொடி” (Blue Flag) தரச்சான்று பெற்ற பகுதியாக அறிவிக்க தேவையான நடவடிக்கைகள் எடுக்க வேண்டும் என்றும், அத்தகைய தரச்சான்று பெறும் பகுதிகளில் எந்தவிதமான கடைகளையும் அனுமதிக்கக் கூடாது என்றும் நீதிமன்றம் உத்தரவிட்டது.
மேலும், உழைப்பாளர் சிலையின் பின்புறத்தில் நிரந்தரமாக அமைக்கப்பட்டுள்ள கடைகளை உடனடியாக அகற்ற வேண்டும் என்றும் நீதிபதிகள் ஆணையிட்டனர்.
உலகின் வேறு எந்த கடற்கரையிலும் இவ்வளவு அதிகமான கடைகள் இல்லை என்றும், சாலையிலிருந்து கடலை ரசிக்க முடியாத அளவிற்கு கடைகள் மறைத்துக் கொண்டிருப்பது ஏற்றுக்கொள்ள முடியாதது என்றும் நீதிமன்றம் குறிப்பிட்டது. இதன் காரணமாக, கடைகளின் எண்ணிக்கையை கணிசமாக குறைக்க வேண்டும் என அறிவுறுத்தப்பட்டது.
கடற்கரை என்பது பொதுமக்கள் இயற்கை அழகை அனுபவிக்க உருவாக்கப்பட்ட இடமே தவிர, அதை வணிக வளாகமாக மாற்ற இயலாது என்றும், சுற்றுலா பயணிகளும் பொதுமக்களும் தடையின்றி கடற்கரையை ரசிக்கக் கடைகள் இடையூறாக இருக்காத வகையில் நடவடிக்கை எடுக்க வேண்டும் என்றும் நீதிபதிகள் வலியுறுத்தினர்.
இதனைத் தொடர்ந்து, கடைகளின் எண்ணிக்கையை குறைத்து, புதிய செயல்திட்டத்தை தயாரித்து தாக்கல் செய்ய சென்னை மாநகராட்சிக்கு அவகாசம் வழங்கப்பட்டது. வழக்கின் அடுத்த விசாரணை ஜனவரி 8 ஆம் தேதிக்கு ஒத்திவைக்கப்பட்டுள்ளது.
