வாரத்திற்கு ஒருநாளாவது குடும்பமாக இணைந்து வழிபாடு மேற்கொள்ள வேண்டும் – மோகன் பாகவத் அறிவுரை
சாதி, பொருளாதார நிலை அல்லது மொழி போன்ற காரணங்களின் அடிப்படையில் மனிதர்களை மதிப்பிடுவது தவறானது என்று ஆர்.எஸ்.எஸ் தலைவர் மோகன் பாகவத் தெரிவித்துள்ளார்.
சத்தீஸ்கர் மாநிலம் ராய்ப்பூரில் நடைபெற்ற இந்து சம்மேளன மாநாட்டில் கலந்துகொண்டு உரையாற்றிய மோகன் பாகவத், நாக்பூரில் ஒரு சிறிய “ஷாகா” என்ற அமைப்பாக தொடங்கிய ஆர்.எஸ்.எஸ் இயக்கம், இன்று நாடு முழுவதும் விரிந்து செயல்பட்டு வருவதாகக் கூறினார்.
மக்களை அவர்களின் பிறப்பு, செல்வாக்கு அல்லது பேசும் மொழி ஆகியவற்றின் அடிப்படையில் பிரித்து பார்க்கக் கூடாது என்றும், இந்த நாடு அனைவருக்கும் பொதுவானது என்ற எண்ணமே உண்மையான சமூக ஒற்றுமையின் அடையாளம் என்றும் அவர் விளக்கினார்.
மேலும், வாரத்தில் குறைந்தது ஒருநாளாவது குடும்ப உறுப்பினர்கள் அனைவரும் ஒன்றாகச் சேர்ந்து வழிபாடு அல்லது பிரார்த்தனையில் ஈடுபட வேண்டும் என்றும், வீட்டில் தயாரித்த உணவை ஒருசேர அமர்ந்து உண்பது குடும்ப உறவுகளை வலுப்படுத்தும் என்றும் அவர் வலியுறுத்தினார்.
ஒற்றுமையுடன் செயல்படும் இந்து சமூகம் எந்தவிதமான சவால்களையும் எதிர்கொள்ளும் வலிமை கொண்டதாக இருக்கும் என்றும், அத்தகைய ஒன்றுபட்ட சமுதாயமே நெருக்கடி காலங்களில் நாட்டை காக்கும் சக்தியாக அமையும் என்றும் மோகன் பாகவத் தெரிவித்தார்.
