ராமதாஸ் அணியின் சார்பில் செயற்குழு–பொதுக்குழு கூட்டம்: 27 தீர்மானங்களுக்கு ஒப்புதல்
சேலம் நகரில் நடைபெற்ற பாட்டாளி மக்கள் கட்சியின் செயற்குழு மற்றும் பொதுக்குழு கூட்டத்தில் மொத்தமாக 27 முக்கிய தீர்மானங்கள் நிறைவேற்றப்பட்டன.
பாமக நிறுவனர் ராமதாஸ் அணியின் ஏற்பாட்டில் நடைபெற்ற இந்த கூட்டத்தில், வரவிருக்கும் சட்டமன்றத் தேர்தல் கூட்டணி உள்ளிட்ட முக்கிய அரசியல் விவகாரங்கள் குறித்து விரிவாக ஆலோசிக்கப்பட்டது. இதன் தொடர்ச்சியாக பல தீர்மானங்கள் உறுப்பினர்களின் ஒப்புதலுடன் நிறைவேற்றப்பட்டன.
இந்த தீர்மானங்களின் படி, பாட்டாளி மக்கள் கட்சியின் தலைவராக ராமதாஸ் மீண்டும் தேர்ந்தெடுக்கப்பட்டார். கட்சியின் பொதுச் செயலாளராக முரளிசங்கரும், கவுரவத் தலைவராக ஜி.கே. மணியும் நியமிக்கப்படுவதாக தீர்மானம் நிறைவேற்றப்பட்டது.
மேலும், வரவிருக்கும் தேர்தலுக்கான கூட்டணி தொடர்பான முடிவுகளை எடுக்க முழு அதிகாரமும் ராமதாஸுக்கு வழங்கப்பட வேண்டும் என்ற தீர்மானமும் கூட்டத்தில் ஏகமனதாக நிறைவேற்றப்பட்டது.
