AI – அணு ஆயுதப் போர்: மனித கற்பனையை மீறும் பேரழிவு

AI – அணு ஆயுதப் போர்: மனித கற்பனையை மீறும் பேரழிவு

உலகளாவிய அணுஆயுத கட்டுப்பாட்டு ஒப்பந்தங்கள் நாளுக்கு நாள் வலுவிழந்து வரும் நிலையில், புதியதும் மிக அபாயகரமானதுமான அணு ஆயுதப் போட்டி உருவெடுத்து வருகிறது. ஆயுதங்களைவிட வேகமாக சிந்தித்து செயல்படும் செயற்கை நுண்ணறிவு (AI) இணைக்கப்பட்ட அணு ஆயுதங்கள், உலக பாதுகாப்பிற்கு பெரும் அச்சுறுத்தலாக மாறக்கூடும் என சர்வதேச பாதுகாப்பு நிபுணர்கள் எச்சரிக்கை விடுக்கத் தொடங்கியுள்ளனர். அந்த அச்சுறுத்தலை விளக்கும் ஒரு விரிவான செய்தி தொகுப்பிது.

1983ஆம் ஆண்டு, சோவியத் யூனியன் ராணுவத்தில் லெப்டினன்ட் கர்னலாக பணியாற்றிய ஸ்டானிஸ்லாவ் பெட்ரோவ், ஒரு ரகசிய கண்காணிப்பு மையத்தில் பணியில் இருந்தார். அப்போது அவரது கணினித் திரையில் “ஏவுகணை தாக்குதல்” என்ற எச்சரிக்கை ஒளிர்ந்தது. அந்த தகவல், அமெரிக்கா சோவியத் யூனியன் மீது ஐந்து அணு ஏவுகணைகளை ஏவியுள்ளதாகக் காட்டியது.

இத்தகைய தகவல் கிடைத்தவுடன் மேலதிகாரிகளுக்கு உடனடியாக அறிவிக்க வேண்டும் என்பதே நடைமுறை விதி. ஆனால் பெட்ரோவ் அதைப் பின்பற்றவில்லை. அவர் தகவலை அனுப்பியிருந்தால், அதனைத் தொடர்ந்து அமெரிக்கா மீது சோவியத் யூனியன் அணு தாக்குதலை மேற்கொண்டிருக்க வாய்ப்பு இருந்தது.

அமெரிக்க ராணுவத்தின் முதல் தன்னாட்சி ஆயுதக் கொள்கையை வடிவமைத்த பென்டகன் குழுவை தலைமை தாங்கிய முன்னாள் ராணுவ வீரர் பால் ஷார்ரே, இந்த சம்பவத்தை முன்வைத்து ஒரு அதிர்ச்சி தரும் கேள்வியை எழுப்புகிறார். “பெட்ரோவின் இடத்தில் மனிதர் இல்லாமல் ஒரு AI உதவியாளர் இருந்திருந்தால், என்ன முடிவு எடுக்கப்பட்டிருக்கும்?” என்பதே அந்த கேள்வி. அந்த AI, விவேகமாக அமைதியைத் தேர்ந்திருப்பதா, அல்லது உடனடியாக பேரழிவை ஏற்படுத்தும் எதிர்தாக்குதலைத் தொடங்கியிருப்பதா என்பது இன்னமும் பதிலில்லா கேள்வியாக உள்ளது.

சமீப காலங்களில், ரஷ்யா செயற்கை நுண்ணறிவால் இயக்கப்படும் ‘புரேவெஸ்ட்னிக்’ ஏவுகணை மற்றும் ‘பொசைடன்’ அணு நீர்மூழ்கி ட்ரோன் ஆகியவற்றை வெற்றிகரமாக சோதனை செய்துள்ளது. இதே காலகட்டத்தில், கடந்த மூன்று தசாப்தங்களாக நிறுத்தி வைத்திருந்த அணு ஆயுத சோதனைகளை மீண்டும் தொடங்க அமெரிக்க முன்னாள் அதிபர் ட்ரம்ப் உத்தரவிட்டதைத் தொடர்ந்து, AI தொழில்நுட்பம் இணைந்த புதிய அணு ஆயுதப் போட்டி வேகமெடுத்துள்ளது.

தற்போது அமெரிக்கா, ரஷ்யா, சீனா, பிரிட்டன், பிரான்ஸ், இந்தியா மற்றும் பாகிஸ்தான் ஆகிய நாடுகள் அதிகாரப்பூர்வமாக அணு ஆயுதங்களை வைத்துள்ளன. இஸ்ரேல் மற்றும் வடகொரியாவும் அணு ஆயுதங்கள் கொண்டதாகக் கருதப்பட்டாலும், அவை வெளிப்படையாக உறுதிப்படுத்தப்படவில்லை. SIPRI (ஸ்டாக்ஹோம் சர்வதேச அமைதி ஆய்வு நிறுவனம்) அறிக்கையின்படி, உலகம் முழுவதும் சுமார் 13,000 அணு ஆயுதங்கள் உள்ளன. இதில் ரஷ்யாவிடம் சுமார் 6,000, அமெரிக்காவிடம் 5,400, சீனாவிடம் சுமார் 600 அணு ஆயுதங்கள் உள்ளதாக மதிப்பிடப்பட்டுள்ளது.

இந்த சூழலில், AI அடிப்படையிலான அணு ஆயுதங்களை உருவாக்கும் முயற்சிகளுடன் சேர்ந்து, AI மூலம் செயல்படும் கண்காணிப்பு, கண்டறிதல் மற்றும் தாக்குதல் தடுக்கல் அமைப்புகளையும் அமெரிக்கா, ரஷ்யா மற்றும் சீனா தீவிரமாக உருவாக்கி வருகின்றன. அமெரிக்கா தனது அணுசக்தி கட்டமைப்பில் பாதுகாப்பு, அங்கீகாரம் மற்றும் முடிவெடுப்பு திறன்களுடன் கூடிய AI அமைப்புகளை ஒருங்கிணைத்துள்ளது. அதேபோல், சீனாவும் அணு ஆயுதங்களின் கட்டளை, கட்டுப்பாடு, நிர்வாகம் மற்றும் செயல்படுத்தும் முடிவுகளில் AI தொழில்நுட்பத்தை பயன்படுத்தத் தொடங்கியுள்ளது.

இதுவரை சைபர் போர் மற்றும் மின்னணு போர் துறைகளில் முக்கிய பங்கு வகித்த AI, இப்போது அணு ஆயுதப் போரிலும் ஆதிக்கம் செலுத்தும் நிலைக்கு வந்துள்ளது. கட்டளை, கட்டுப்பாடு, கண்காணிப்பு, தகவல் தொடர்பு, உளவு சேகரிப்பு உள்ளிட்ட அனைத்துத் துறைகளையும் ஒருங்கிணைத்து, தரவுகளை உடனடி பகுப்பாய்வுக்கு உட்படுத்தி, கண நேரத்தில் முடிவெடுக்க AI உதவுகிறது.

அணு ஆயுத துறையில் AI இணைப்பு என்பது போர் முறைகளையே முற்றிலும் மாற்றி அமைக்கும் தன்மை கொண்டதாக பார்க்கப்படுகிறது. “முதலில் அணு ஆயுதத்தை பயன்படுத்த மாட்டோம்” என்ற கொள்கையே AI மூலம் மாற்றம் அடையக்கூடும் என நிபுணர்கள் எச்சரிக்கின்றனர். எந்த இலக்கை முன்னதாக தாக்குவது, தாக்குதல் எப்படி அமைய வேண்டும், எதிரியின் நடவடிக்கையை எவ்வாறு திசை திருப்புவது, தொடர் தாக்குதலை எப்படிச் செயல்படுத்துவது போன்ற பரிந்துரைகளை வழங்குவதோடு, AI தன்னிச்சையாக மனித அனுமதி இல்லாமலேயே தாக்குதலை ஆரம்பிக்கும் திறனையும் பெற்றுள்ளதாக கூறப்படுகிறது.

வானிலும், கடலிலும், கடலின் அடியிலும், நிலத்திலும், இணையவழியிலும் ஒருங்கிணைந்து செயல்படும் ஆயிரக்கணக்கான AI ட்ரோன்கள் ஒரே நேரத்தில் பல திசைகளிலிருந்து தாக்குதல் நடத்தும். இது ஒவ்வொரு அணியிலும் நூறு வீரர்களும் ஐம்பது பந்துகளும் உள்ள ஒரு கால்பந்து போட்டியைப் போன்ற, கட்டுப்படுத்த முடியாத போர்க்கள சூழலை உருவாக்கும். இத்தகைய சூழலில் அணு ஆயுதங்களும் AI கட்டுப்பாட்டில் சென்றால் அதன் விளைவுகள் பேரழிவாக இருக்கும் என எச்சரிக்கப்படுகிறது.

அணு ஆயுதங்களை பயன்படுத்தும் இறுதி அனுமதியில் AI நேரடியாக ஈடுபடுத்தப்பட்டுள்ளதாக எந்த அணுசக்தி நாடும் இதுவரை அதிகாரப்பூர்வமாக அறிவிக்கவில்லை. ஆனால் அந்த திசையில் சீனா, ரஷ்யா மற்றும் அமெரிக்கா மறைமுக முயற்சிகளை மேற்கொண்டு வருகின்றன. அணு தாக்குதல் தொடர்பான முடிவுகளை AI எடுக்காது என்ற உறுதியை இந்த நாடுகளின் தலைவர்கள் இதுவரை அளிக்கவில்லை என்பதும் குறிப்பிடத்தக்கது. ஒரு நாட்டின் ராணுவ அமைப்புகள் முழுமையாக AI மூலம் ஒருங்கிணைக்கப்படும் போது, மனிதர்களால் பின்தொடர முடியாத அளவிற்கு போர் நடவடிக்கைகளின் வேகம் அதிகரிக்கும்.

AI வழிநடத்தும் அணு ஆயுதங்கள், போர்களில் ஒரு புதிய காலகட்டத்தைத் தொடங்கியுள்ளன. அறிவியல் முன்னேற்றம் புவியியல் அரசியலில் புதிய மாற்றங்களையும் அச்சுறுத்தல்களையும் உருவாக்குகிறது. AI தனக்குத் தனியாக போரை உருவாக்காது என்றாலும், அது எப்போதும் போரை கட்டுப்பாட்டுக்குள் வைத்திருக்கும் என்ற உத்தரவாதம் இல்லை என பாதுகாப்பு நிபுணர்கள் தெரிவிக்கின்றனர். மனிதர்கள் கட்டுப்படுத்த முடியாத வேகத்தில் நடைபெறும் AI இயக்கும் அணு போரை எவ்வாறு முடிவுக்கு கொண்டு வருவது என்பதற்கான தெளிவான பதில் எவரிடமும் இல்லை. இத்தகைய போர், பங்குச் சந்தையில் ஏற்படும் திடீர் சரிவைப் போல, கண நேரத்தில் கட்டுப்பாட்டை மீறி பரவக்கூடும் என்றும் எச்சரிக்கப்படுகிறது.