மெரினா கடற்கரையில் உயர்நீதிமன்ற நீதிபதிகள் நேரடி ஆய்வு
சென்னை மெரினா கடற்கரையில் கடைகள் அமைப்பது தொடர்பான வழக்கின் அடிப்படையில், உயர்நீதிமன்ற நீதிபதிகளான சுரேஷ்குமார் மற்றும் ஜெகதீஷ் சந்திரா ஆகியோர் நேரில் ஆய்வு மேற்கொண்டனர்.
இந்த ஆய்வின் போது, சென்னை மாவட்ட ஆட்சியர் ரஷ்மி சித்தார்த் ஜகடே, மாநகராட்சி ஆணையர் குமரகுருபரன், காவல் ஆணையர் அருண் உள்ளிட்ட உயர்மட்ட அதிகாரிகள் நீதிபதிகளுடன் உடன் இருந்தனர்.
கடற்கரையில் கடைகள் எத்தனை அடி இடைவெளியில் அமைக்கப்பட உள்ளன, பொதுமக்கள் தடையின்றி மற்றும் அமைதியான சூழலில் கடல் அழகை ரசிக்க இயலுமா போன்ற விஷயங்களை குறித்து மாநகராட்சி ஆணையரிடம் நீதிபதிகள் தொடர்ந்து கேள்விகள் எழுப்பினர்.
மேலும், மெரினா கடற்கரைக்கு சர்வதேச அளவில் வழங்கப்படும் ‘நீலக்கொடி’ (Blue Flag) சான்றிதழ் பெற தேவையான நடவடிக்கைகள் எடுக்கப்பட வேண்டும் என அதிகாரிகளுக்கு நீதிபதிகள் அறிவுறுத்தினர். அந்தச் சான்றிதழ் வழங்கப்படாத நிலை ஏற்பட்டால், அதற்கு மாற்றான ஏற்பாடுகளை உடனடியாக மேற்கொள்ள வேண்டும் என்றும் உத்தரவிட்டனர்.
இந்த அறிவுறுத்தல்கள் அனைத்தும் அதிகாரப்பூர்வ உத்தரவாக விரைவில் வெளியிடப்படும் எனவும் நீதிபதிகள் தெரிவித்தனர்.
