உலகளவில் உயரும் இந்திய விண்வெளி ஸ்டார்ட்அப் SKYROOT-ன் மதிப்பு!
இந்தியாவின் முன்னணி தனியார் விண்வெளி ஸ்டார்ட்அப் Skyroot Aerospace மீது சர்வதேச கவனம் அதிகரித்து வருகிறது. சிறிய செயற்கைக்கோள்களை விண்ணில் ஏவுவதற்கான விக்ரம்–1 ராக்கெட்டின் முதல் நடவடிக்கைகள் இறுதிக்கட்டத்தை எட்டியுள்ள நிலையில், உலக நாடுகள் இதற்கான வாய்ப்புகளைப் பெற சிறந்த போட்டியில் ஈடுபட்டுள்ளன.
விக்ரம்–1 ராக்கெட் மூலம் அதிகபட்சம் 500 கிலோ வரை உள்ள செயற்கைக்கோள்களையே ஏவ முடியும் என்ற வரம்பு இருந்தாலும், அந்த அளவுக்குள் கூட இடம் பெறுவது கடினம் என Skyroot நிறுவனத்தின் இணை நிறுவனர் மற்றும் தலைமைச் செயல் அதிகாரி பவன்குமார் சந்தானா தெரிவித்துள்ளார். ராக்கெட் எஞ்சின் சோதனைகள் அனைத்தும் வெற்றிகரமாக முடிந்ததால், நாட்டு நாட்டு வாடிக்கையாளர்கள் அதிக ஆர்வம் காட்டுவதாகவும் அவர் கூறுகிறார்.
புதிதாக அமைக்கப்பட்ட ‘Infinity Campus’ வளாகத்தை பிரதமர் நரேந்திர மோடி காணொளி வழி திறந்து வைத்த பிறகு, தங்கள் நிறுவனத்தின் நம்பகத்தன்மை மேலும் உயர்ந்துள்ளதாகவும் பவன்குமார் சந்தானா குறிப்பிட்டார்.
2 லட்சம் சதுர அடியில் உருவாக்கப்பட்ட இந்த மையம் முழுவதுமே உள்நாட்டு தளவாடங்களைக் கொண்டு கட்டமைக்கப்பட்டதாகவும், விக்ரம் ராக்கெட்டுகளுக்கான முக்கிய கூறுகள் இதே வளாகத்திலேயே தயாரிக்கப்படுகின்றன என்றும் அவர் விளக்கினார்.
மொத்தம் 1,000-க்கும் மேற்பட்ட பணியாளர்களைக் கொண்ட Skyroot நிறுவனத்தில், புதிதாக திறக்கப்பட்ட ‘Infinity Campus’-இல் மட்டும் 600 பேர் பணிபுரிய உள்ளனர்.
விக்ரம்–1 ராக்கெட்டின் அனைத்து தொழில்நுட்ப பரிசோதனைகளும் நிறைவடைந்த நிலையில், ஏவுதலுக்கான இறுதி முறைகள் தீவிரமாக முன்னேறி வருகின்றன.
அடுத்த மூன்று மாதங்களுக்குள் தங்களது முதல் செயற்கைக்கோள் ஏவுதல் நடைபெறும் எனவும் அவர் தெரிவித்துள்ளார்.
பெரிய ராக்கெட்டுகள் மூலம் அடைய முடியாத குறிப்பிட்ட புவிவட்டப் பாதைகளில் சிறு செயற்கைக்கோள்களை நிலைநிறுத்துவது சாத்தியமானதால், வாடிக்கையாளர்கள் Skyroot-ஐ நாடுகின்றனர். ரயில்–கார் போக்குவரத்து வேறுபாட்டை எடுத்துக்காட்டாக வைத்து அவர் இதனை விளக்கினார்.
பாஜக அரசு தனியார் விண்வெளி துறையை ஊக்குவிக்கும் சூழலில், Skyroot Aerospace நிறுவனம் SpaceXக்கு இணையாக உலக மேடையில் முன்னேற தயாராகி வருகிறது என்பதைக் கூறலாம்.
