விண்வெளித் துறையில் இந்தியா படைத்த புதிய மைல் கல்!
ஹைதராபாத் நகரை மையமாகக் கொண்டு செயல்படும் ஸ்கைரூட் ஏரோஸ்பேஸ் நிறுவனம், நாட்டின் முதல் தனியார் ராக்கெட்டான விக்ரம்–1 ஐ வெற்றிகரமாக உருவாக்கியுள்ளது. இதை வெளியிட்டு பேசுகையில், பிரதமர் நரேந்திர மோடி, இந்தியாவின் தனியார் விண்வெளித் துறையின் புதிய காலத்தை அதிகாரபூர்வமாகத் தொடங்கியதாகக் குறிப்பிடினார்.
இரு நிலைகளை உடைய இந்த ராக்கெட்டை உருவாக்கிய ஸ்கைரூட் நிறுவனம் 2018 ஆம் ஆண்டு விஞ்ஞானிகளான பவன் குமார் சந்தனா மற்றும் நாக பாரத் டாகா ஆகியோரால் தொடங்கப்பட்டது. இருவரும் முன்பு இஸ்ரோவில் பணியாற்றியவர்கள். பவன் குமார் சந்தனா ஐந்து ஆண்டுகள் GSLV Mk-3 க்கு பணியாற்றிய அனுபவம் கொண்டவர். அதேபோல், நாக பாரத் டாகா விக்ரம் சாராபாய் மையத்தில் பறக்கும் கணினி பொறியாளராகப் பணியாற்றியவர்.
ஏழு மாடிக் கட்டட உயரம் கொண்ட விக்ரம்–1, சுமார் 300 கிலோ எடை கொண்ட செயற்கைக்கோளை தாழ்வான பூமி வட்டப்பாதையில் செலுத்தும் திறன் கொண்டது. இதற்கு கார்பன் ஃபைபர் உட்பட மேம்பட்ட பொருட்கள் பயன்படுத்தப்பட்டுள்ளன. 3டி பிரிண்டிங் தொழில்நுட்பத்தில் தயாரிக்கப்பட்ட திரவ எரிபொருள் இயந்திரங்களும் இதில் பொருத்தப்பட்டுள்ளன.
ஹைதராபாத் இன்ஃபினிட்டி கேம்பஸ் மற்றும் விக்ரம்–1 ராக்கெட்டை திறந்து வைத்த பிரதமர் மோடி, சிறிய செயற்கைக்கோள்களின் தேவைகள் அதிகரித்து வரும் நிலையில் இந்திய தனியார் நிறுவனங்கள் விண்வெளியில் உலகளவில் நல்ல முன்னேற்றம் சாதித்து வருவதாகக் குறிப்பிட்டார். இந்தியாவின் தனியார் துறைகள் தற்போது உலக முதலீட்டாளர்களின் கவனத்தை ஈர்க்கும் நிலையில் உள்ளன என்றும் அவர் தெரிவித்தார்.
தனியார் விண்வெளித் துறையினை திறந்ததிலிருந்து, குறிப்பாக GEN-Z இளைஞர்கள் மிகுந்த நாட்டத்துடன் ஸ்டார்ட்-அப்புகளை உருவாக்கி வருவதாக பிரதமர் பாராட்டினார். தற்போது 300-க்கும் அதிகமான ஸ்டார்ட்-அப்கள், குறைந்த செலவிலும் சிறிய அணிகளோடும், இந்திய விண்வெளியின் எதிர்காலத்திற்கு புதிய நம்பிக்கை உருவாக்கி வருவதாகவும் அவர் கூறினார்.
விக்ரம்-1 ராக்கெட் இந்திய விண்வெளி திட்டத்தின் தந்தை விக்ரம் சாராபாயின் பெயரால் அழைக்கப்படுகிறது. இந்த ராக்கெட்டை எந்த ஏவுதளத்திலிருந்தும் 24 மணி நேரத்திற்குள் ஏவ முடியும் என்பதால், வாடிக்கையாளர்களுக்கு அதிவேக சேவை வழங்கும் திறன் பெற்றதாக ஸ்கைரூட் தகவல் தெரிவித்துள்ளது.
இந்த ராக்கெட்டின் ஒவ்வொரு நிலையும் நாட்டின் பல்வேறு சோதனை மையங்களில் பரிசோதிக்கப்பட்டு வருகிறது. அனைத்தையும் ஒருங்கிணைத்த பிறகு, இந்த ஆண்டு இறுதியில் ஸ்ரீஹரிக்கோட்டாவில் இருந்து ஏவ திட்டமிடப்பட்டுள்ளது.
ஸ்கைரூட் ஏரோஸ்பேஸ் ஏற்கனவே 2022 ஆம் ஆண்டு விக்ரம்–S ராக்கெட்டை வெற்றிகரமாக துணை வட்டப்பாதையில் ஏவியிருந்தது. அது சென்னையின் ஸ்பேஸ் கிட்ஸ், ஆந்திராவின் N-ஸ்பேஸ்டெக் மற்றும் அர்மேனியாவின் Bazoom Q லேப் ஆகியவற்றின் சுமைகளை எடுத்துச் சென்றது.
இவ்வாறு, விக்ரம்–1 ராக்கெட், இந்தியாவின் தனியார் விண்வெளித் துறையை உலக மேடையில் உயர்த்தும் முக்கிய சாதனையாக உருவெடுத்துள்ளது.
