‘மகுடம்’ இயக்குநராக பொறுப்பேற்றது ஏன்? – விஷால் விளக்கம்
நடிகர் விஷால், தனது அடுத்த படமான ‘மகுடம்’ திரைப்படத்தின் இயக்குநராக அதிகாரபூர்வமாக பொறுப்பேற்றுள்ளதாகவும், அதற்கான காரணத்தை விளக்கி உள்ளார்.
இப்படம் முதலில் ரவி அரசு இயக்கத்தில் தொடங்கப்பட்டது. ஆனால் சில வாரங்களுக்குள், படப்பிடிப்பு தளத்தில் விஷால் தானே இயக்கும் காட்சிகள் சமூக ஊடகங்களில் வெளிவந்தன. இதன் மூலம் அவர் இயக்குநராக பொறுப்பேற்றிருப்பது உறுதியாகியது.
தீபாவளியை முன்னிட்டு வெளியிட்டுள்ள அறிக்கையில் விஷால் கூறியதாவது:
“இந்த சிறப்பான நாளில், என் புதிய படம் ‘மகுடம்’ படத்தின் இரண்டாவது போஸ்டரை தீபாவளி வாழ்த்துகளுடன் வெளியிடுவதில் பெரும் மகிழ்ச்சி அடைகிறேன்.
அதோடு, படப்பிடிப்பு தொடங்கிய தொடக்கத்திலேயே எடுத்திருந்த ஒரு முக்கியமான முடிவை இப்போது அதிகாரபூர்வமாக அறிவிக்கிறேன் — ‘மகுடம்’ திரைப்படத்தை நான் தானே இயக்குகிறேன்.
இது ஒரு கட்டாய முடிவு அல்ல. என் மீது ரசிகர்கள் வைத்திருக்கும் அன்பும், தயாரிப்பாளர்கள் கொண்ட நம்பிக்கையும் என்னை இந்த முடிவை எடுக்க வைத்தது. இது பொறுப்புணர்வின் அடிப்படையில் எடுத்த தீர்மானம்.
ஒரு நடிகராக நான் எப்போதுமே திரையுலகையும், என் ரசிகர்களையும் நம்புகிறேன். அந்த நம்பிக்கையை காக்கும் பொறுப்பே எனது இயக்குநர் முடிவின் பின்னணி. இந்த தீபாவளி எனக்கு ஒரு புதிய ஒளியான துவக்கம். அனைவருக்கும் இனிய தீபாவளி நல்வாழ்த்துகள்.”
என விஷால் தெரிவித்துள்ளார்.
