மகளிர் இடஒதுக்கீடு மசோதாவுக்கு இண்டி கூட்டணி முழு ஆதரவு – மல்லிகார்ஜூன கார்கே அறிவிப்பு!
நாடாளுமன்றம் மற்றும் சட்டமன்றங்களில் பெண்களுக்கு இடஒதுக்கீடு வழங்கும் மசோதாவுக்கு இண்டி (I.N.D.I.A) கூட்டணி முழு ஆதரவு அளிப்பதாக காங்கிரஸ் தலைவர் மல்லிகார்ஜூன கார்கே தெரிவித்துள்ளார். முன்னதாக, மகளிர் இடஒதுக்கீடு மசோதாவுக்கு அனைத்துக் கட்சிகளும் ஒருமனதாக ஆதரவு அளிக்க வேண்டும் என்று பிரதமர் நரேந்திர மோடி வேண்டுகோள் விடுத்திருந்தார். இது குறித்து ஆலோசிப்பதற்காக, டெல்லியில் மல்லிகார்ஜூன கார்கே தலைமையில் எதிர்க்கட்சிகளின் முக்கிய ஆலோசனைக் கூட்டம் நடைபெற்றது.
இந்தக் கூட்டத்திற்குப் பிறகு செய்தியாளர்களைச் சந்தித்த கார்கே, “நாடாளுமன்றம் மற்றும் சட்டமன்றங்களில் பெண்களுக்கு உரிய பிரதிநிதித்துவத்தை உறுதி செய்யும் இந்த மசோதாவை இண்டி கூட்டணி ஒருபோதும் எதிர்க்கவில்லை; மாறாக இதனை நாங்கள் முழுமையாக ஆதரிக்கிறோம்” என்று தெளிவுபடுத்தினார். மத்திய அரசின் இந்த முன்னெடுப்பிற்குத் தங்களது கூட்டணி துணை நிற்கும் என்பதையும் அவர் உறுதிபடத் தெரிவித்தார்.
