“ஏன் இவ்வளவு எளிதாக இருக்கிறது?” – இந்திய மருத்துவச் சேவையை வியந்து பாராட்டிய அமெரிக்கப் பெண்!
இந்தியாவின் மருத்துவக் கட்டமைப்பு மற்றும் சேவைகளை அமெரிக்கப் பெண் ஒருவர் வியந்து பாராட்டிப் பேசியுள்ள வீடியோ தற்போது சமூக வலைதளங்களில் வைரலாகி வருகிறது. அமெரிக்காவைச் சேர்ந்த லிஸ் என்பவர் தனது இன்ஸ்டாகிராம் பக்கத்தில் வெளியிட்டுள்ள இந்த வீடியோவில், அமெரிக்கா மற்றும் இந்தியாவின் மருத்துவ நடைமுறைகளை ஒப்பிட்டுப் பேசியுள்ளார்.
வீடியோவின் தொடக்கத்தில் “இந்திய மருத்துவ சேவை மிகவும் எரிச்சலூட்டுகிறது” என்று கிண்டலாகக் கூறி அனைவரது கவனத்தையும் ஈர்த்த அவர், அமெரிக்காவில் ஒரு சாதாரணப் பரிசோதனைக்குக் கூடப் பல கிளினிக்குகளைத் தொடர்பு கொண்டு நீண்ட நாட்கள் காத்திருக்க வேண்டிய (Appointment) நிலை உள்ளதைச் சுட்டிக்காட்டினார். ஆனால் இந்தியாவில், எவ்வித முன் அனுமதியும் இன்றி நேரடியாக மருத்துவமனைக்குச் சென்று அதே நாளில் மருத்துவரைச் சந்திக்க முடிவது தமக்கு ஆச்சரியத்தை அளிப்பதாகத் தெரிவித்துள்ளார்.
மேலும், சிகிச்சை மற்றும் மருத்துவப் பரிசோதனைகளுக்கான கட்டணம் அமெரிக்காவை விட இந்தியாவில் மிகக் குறைவாக இருப்பதையும் அவர் பாராட்டியுள்ளார். “இந்தியா ஏன் தனது நாட்டு மக்களுக்கு வாழ்க்கையை இவ்வளவு எளிதாக்குகிறது?” என்று அவர் நகைச்சுவையுடன் எழுப்பியுள்ள கேள்வி, இந்தியாவின் மருத்துவச் சேவை சாமானியர்களுக்கு எவ்வளவு எளிதாகவும் மலிவாகவும் கிடைக்கிறது என்பதை உலகிற்குப் பறைசாற்றுவதாக அமைந்துள்ளது.
