மத்திய கிழக்கில் பரபரப்பு: அமைதிப் பேச்சுவார்த்தைக்கு நடுவே 1,000 கூடுதல் வீரர்களை அனுப்ப அமெரிக்கா முடிவு!
வாஷிங்டன்:
மத்திய கிழக்கு பிராந்தியத்தில் நிலவி வரும் பதற்றமான சூழலைக் கட்டுப்படுத்தவும், தனது பாதுகாப்பு நிலைகளை வலுப்படுத்தவும் மேலும் 1,000 கூடுதல் ராணுவ வீரர்களை அங்கு அனுப்ப அமெரிக்கா அதிரடி முடிவெடுத்துள்ளது. ஈரானுடன் ஒருபுறம் அமைதிப் பேச்சுவார்த்தைகள் நடைபெற்று வரும் வேளையில், அமெரிக்காவின் இந்த ராணுவ நகர்வு சர்வதேச அளவில் முக்கியத்துவம் வாய்ந்ததாகப் பார்க்கப்படுகிறது.
RelatedPosts
ஈரானுடனான போரை நிறுத்தி, பிராந்தியத்தில் அமைதியை நிலைநாட்டும் வகையில் 15 அம்சங்கள் கொண்ட விரிவான அமைதித் திட்டத்தை அமெரிக்க அதிபர் டொனால்ட் டிரம்ப் முன்மொழிந்துள்ளார். இந்தத் திட்டத்தைச் செயல்படுத்துவது தொடர்பாக அமெரிக்காவின் உயர்மட்டக் குழு ஒன்று தீவிரமாகச் செயல்பட்டு வருகிறது. இதில் அமெரிக்கத் துணை அதிபர் ஜேடி வான்ஸ், வெளியுறவுத்துறை அமைச்சர் மார்கோ ரூபியோ, மத்திய கிழக்கு நாடுகளுக்கான சிறப்புத் தூதர் ஸ்டீவ் விட்காப் மற்றும் டிரம்பின் மருமகன் ஜாரெட் குஷ்னர் ஆகியோர் இடம்பெற்றுள்ளனர்.
இந்தக் குழுவினர் ஈரானுடன் தொடர்ச்சியான பேச்சுவார்த்தைகளில் ஈடுபட்டு வரும் நிலையிலும், பாதுகாப்பு முன்னெச்சரிக்கையாகக் கூடுதல் வீரர்களை அனுப்ப அமெரிக்கா தீர்மானித்துள்ளது. தூதரக ரீதியிலான பேச்சுவார்த்தைகள் ஒருபுறம் நடந்தாலும், பிராந்தியத்தின் பாதுகாப்பில் எவ்வித சமரசமும் செய்துகொள்ள அமெரிக்கா தயாராக இல்லை என்பதையே இந்த நடவடிக்கை காட்டுவதாக அரசியல் ஆய்வாளர்கள் கருதுகின்றனர்.
