ஈரானின் புதிய பாதுகாப்புச் செயலராக முன்னாள் தளபதி முகமது பாகெர் ஜோல்காதிர் நியமனம்!
டெஹ்ரான்:
ஈரான் நாட்டின் மிக உயரிய பாதுகாப்பு அமைப்பான ‘உச்ச தேசிய பாதுகாப்பு கவுன்சிலின்’ (Supreme National Security Council) புதிய செயலராக, இஸ்லாமிய புரட்சிகர பாதுகாப்புப் படையின் (IRGC) முன்னாள் தளபதி முகமது பாகெர் ஜோல்காதிர் அதிகாரப்பூர்வமாக நியமிக்கப்பட்டுள்ளார்.
RelatedPosts
ஈரானின் ராணுவம், அணுசக்தி திட்டங்கள் மற்றும் வெளியுறவுக் கொள்கை தொடர்பான மிக முக்கியமான முடிவுகளை எடுக்கும் அதிகாரம் கொண்ட இந்த அமைப்பின் செயலராக இருந்த அலி லாரிஜானி, சமீபத்தில் நடந்த தாக்குதல் ஒன்றில் கொல்லப்பட்டார். அவரது மறைவைத் தொடர்ந்து ஏற்பட்டுள்ள இந்த வெற்றிடத்தை நிரப்பும் வகையில், அனுபவம் வாய்ந்த முன்னாள் தளபதி ஜோல்காதிர் இந்தப் பொறுப்பிற்குத் தேர்வு செய்யப்பட்டுள்ளார்.
மத்திய கிழக்கு பிராந்தியத்தில் போர் பதற்றம் உச்சகட்டத்தில் இருக்கும் இவ்வேளையில், ஈரானின் இந்த அதிரடி நியமனம் சர்வதேச அளவில் பெரும் முக்கியத்துவம் வாய்ந்ததாகப் பார்க்கப்படுகிறது. குறிப்பாக, இஸ்லாமிய புரட்சிகர பாதுகாப்புப் படையைச் சேர்ந்த ஒருவரை இந்தப் பதவிக்குத் தேர்ந்தெடுத்திருப்பது, நாட்டின் பாதுகாப்பு மற்றும் கொள்கை முடிவுகளில் அந்தப் படையின் செல்வாக்கு மேலும் அதிகரிப்பதையே உணர்த்துவதாக அரசியல் ஆய்வாளர்கள் கருதுகின்றனர்.
