அயோத்தியில் நெல்மணிகளால் உருவான ராமர் சிலைகள்: ராம நவமிக்கு ஒடிசா கலைஞர்களின் அபார படைப்பு!
அயோத்தி:
உத்தரப்பிரதேச மாநிலம் அயோத்தியில் வரும் 26-ஆம் தேதி நடைபெறவுள்ள ராம நவமி பெருவிழாவை முன்னிட்டு, ஒரு லட்சத்திற்கும் அதிகமான நெல்மணிகளைக் கொண்டு வடிவமைக்கப்பட்ட ராமர் சிலைகள் பொதுமக்களின் கவனத்தை ஈர்த்து வருகின்றன.
RelatedPosts
அயோத்தி ராமர் கோயிலில் ராம நவமி விழாவைப் பிரம்மாண்டமாகக் கொண்டாடப் பல்வேறு சிறப்பு ஏற்பாடுகள் செய்யப்பட்டு வருகின்றன. இந்த நன்னாளில் ராமபிரானுக்குச் சிறப்பு காணிக்கையாகச் சமர்ப்பிக்கும் வகையில், ஒடிசா மாநிலத்தைச் சேர்ந்த ஒரு குடும்பத்தினர் தங்களின் கலைத்திறனை வெளிப்படுத்தியுள்ளனர். சுமார் 1 லட்சத்து 21 ஆயிரம் நெல்மணிகளைப் பயன்படுத்தி, மிகவும் நுணுக்கமான முறையில் ராமர், லட்சுமணன், சீதை மற்றும் அனுமன் ஆகியோரின் திருவுருவங்களை அவர்கள் சிலைகளாகச் செதுக்கியுள்ளனர்.
தனித்துவமான முறையில் வடிவமைக்கப்பட்டுள்ள இந்தக் கலைப் படைப்புகள் தற்போது ஒடிசாவிலிருந்து அயோத்தியைச் சென்றடைந்துள்ளன. ராம நவமியன்று இந்தச் சிலைகள் பக்தர்களின் பார்வைக்கும், வழிபாட்டிற்கும் அர்ப்பணிக்கப்பட உள்ளன. நெல்மணிகளால் ஆன இந்தச் சிலைகளின் புகைப்படங்கள் தற்போது சமூக வலைதளங்களில் வைரலாகி வருவதுடன், கலைஞர்களின் அர்ப்பணிப்பிற்குப் பாராட்டுகளும் குவிந்து வருகின்றன.
