நாடு முழுவதும் அதிரடி வேட்டை: பதுக்கி வைக்கப்பட்ட 15,000 சிலிண்டர்கள் பறிமுதல் – மத்திய அரசு அதிரடி!
புது தில்லி: நாடு முழுவதும் சமையல் எரிவாயு சிலிண்டர்கள் பதுக்கப்படுவதைத் தடுக்க மத்திய அரசு மேற்கொண்டு வரும் தீவிர நடவடிக்கையில், இதுவரை சுமார் 15,000 சிலிண்டர்கள் பறிமுதல் செய்யப்பட்டுள்ளன. மேற்கு ஆசியாவில் நிலவும் போர் பதற்றங்கள் காரணமாக எரிவாயு விநியோகத்தில் தட்டுப்பாடு ஏற்படலாம் என்ற வதந்திகளால் உருவான ‘பீதி முன்பதிவு’ (Panic Booking) மற்றும் கறுப்புச் சந்தை விற்பனையைத் தடுக்க இந்த அதிரடி நடவடிக்கை எடுக்கப்பட்டுள்ளது.
12,000 இடங்களில் மெகா சோதனை
மத்திய பெட்ரோலியம் மற்றும் இயற்கை எரிவாயு அமைச்சகத்தின் இணைச் செயலாளர் சுஜாதா சர்மா டெல்லியில் செய்தியாளர்களைச் சந்தித்தார். அப்போது அவர் கூறியதாவது:
“எரிவாயு சிலிண்டர்கள் பதுக்கப்படுவதைக் கட்டுப்படுத்த நாடு முழுவதும் சுமார் 12,000 இடங்களில் தீவிர சோதனைகள் நடத்தப்பட்டன. இந்தச் சோதனைகளின் முடிவில், விதிமுறைகளை மீறி பதுக்கி வைக்கப்பட்டிருந்த 15,000 சிலிண்டர்கள் அதிகாரிகளால் பறிமுதல் செய்யப்பட்டுள்ளன. குறிப்பாக டெல்லி, உத்தரப் பிரதேசம், கேரளா மற்றும் மத்தியப் பிரதேசம் ஆகிய மாநிலங்களில் பெரிய அளவிலான அமலாக்க நடவடிக்கைகள் மேற்கொள்ளப்பட்டுள்ளன.”
கண்காணிப்பில் எண்ணெய் நிறுவனங்கள்
சிலிண்டர் விநியோகத்தில் முறைகேடுகளைத் தவிர்க்க, பொதுத்துறை எண்ணெய் நிறுவனங்கள் (OMCs) சுமார் 2,500 சில்லறை விற்பனை நிலையங்கள் மற்றும் விநியோகஸ்தர்களிடம் திடீர் சோதனைகளை நடத்தியுள்ளன. முறையான விநியோகத்தை உறுதி செய்யவும், கறுப்புச் சந்தையில் சிலிண்டர்கள் விற்கப்படுவதைத் தடுக்கவும் மாநில அரசுகளுடன் இணைந்து மத்திய அரசு பணியாற்றி வருகிறது.
மக்களுக்கு வேண்டுகோள்
நாட்டில் போதுமான அளவு எரிவாயு கையிருப்பு உள்ளதாகவும், பொதுமக்கள் அச்சமடைந்து தேவைக்கு அதிகமாக சிலிண்டர்களை முன்பதிவு செய்ய வேண்டாம் என்றும் மத்திய அரசு கேட்டுக் கொண்டுள்ளது. மேலும், எரிவாயு குழாய் (PNG) இணைப்பு உள்ளவர்கள் தங்களின் சிலிண்டர் இணைப்புகளை ஒப்படைப்பதன் மூலம் மற்றவர்களுக்கு உதவலாம் என்றும் அறிவுறுத்தப்பட்டுள்ளது.
