தை அமாவாசை அனுசரிப்பு – முன்னோர்களுக்குத் தர்ப்பணம் செய்ய நீர்நிலைகளில் பெருமளவு திரண்ட மக்கள்
தை மாத அமாவாசை நாளை முன்னிட்டு, தமிழகத்தின் பல்வேறு புனித தலங்களில் முன்னோர்களுக்கு தர்ப்பணம் செய்ய ஆயிரக்கணக்கான பக்தர்கள் திரண்டனர்.
இந்த நாளில் மறைந்த முன்னோர்களுக்குத் தர்ப்பணம் செய்வது மிகுந்த புண்ணியமாகக் கருதப்படுவதால், ராமேஸ்வரத்தில் உள்ள அக்னி தீர்த்த கடற்கரையில் அதிகாலை முதலே பக்தர்கள் குவிந்தனர். அவர்கள் கடலில் புனித நீராடி, எள், பிண்டம் உள்ளிட்டவற்றை வைத்து தங்கள் மூதாதையருக்குத் தர்ப்பணம் செய்து வழிபாடு மேற்கொண்டனர்.
இதனைத் தொடர்ந்து, ராமநாதசுவாமி திருக்கோயிலில் உள்ள 22 தீர்த்தங்களில் நீராடிய பக்தர்கள், நீண்ட வரிசைகளில் காத்திருந்து சாமி தரிசனம் செய்தனர். கூட்ட நெரிசலை கட்டுப்படுத்தவும், பாதுகாப்பை உறுதி செய்யவும் கோயில் வளாகம் மற்றும் கடற்கரை பகுதிகளில் 500-க்கும் மேற்பட்ட காவல்துறையினர் பணியில் ஈடுபடுத்தப்பட்டனர்.
விருதுநகர் மாவட்டத்தில் உள்ள சதுரகிரி சுந்தர மகாலிங்கம் கோயிலிலும் தை அமாவாசையை முன்னிட்டு பக்தர்கள் பெருமளவில் மலையேறினர். அமாவாசை மற்றும் பெளர்ணமி நாட்களில் நடைபெறும் சிறப்பு பூஜைகளுக்காக, பல்வேறு மாவட்டங்களில் இருந்து வந்த ஆயிரக்கணக்கானோர், தாணிப்பாறை அடிவாரத்திலிருந்து ஐந்து கிலோமீட்டர் தூரம் கடினமான பாதையை கடந்து கோயிலை சென்றடைந்தனர். காலை 10 மணி வரை மட்டுமே அனுமதி வழங்கப்பட்ட நிலையில், பக்தர்கள் விரைவாக சென்று சாமி தரிசனம் செய்தனர்.
ஈரோடு மாவட்டம் பவானி கூடுதுறையிலும் தை அமாவாசை நாளில் முன்னோர்களுக்கான தர்ப்பண நிகழ்ச்சிகள் நடைபெற்றன. சங்கமேஸ்வரர் கோயிலில் அமைந்துள்ள பரிகார மண்டபங்கள் மற்றும் தற்காலிக கூடங்களில், பொதுமக்கள் திதி, பித்ரு பூஜை மற்றும் தர்ப்பணம் செய்து வழிபட்டனர். அண்டை மாவட்டங்கள் மற்றும் வெளிமாநிலங்களில் இருந்து வந்தவர்களின் வருகையால், பாதுகாப்பு ஏற்பாடுகள் அதிகரிக்கப்பட்டன.
தருமபுரி மாவட்டம் ஒகேனக்கல் பகுதியில் காவிரி ஆற்றில் பக்தர்கள் புனித நீராடி, வாழை இலைகளில் பச்சரிசி, தேங்காய், காய்கறிகள் உள்ளிட்டவற்றை வைத்து முன்னோர்களை நினைத்து வழிபாடு செய்தனர்.
இதேபோல், குற்றால அருவி கரை மற்றும் பாபநாசம் ஆற்றங்கரைகளிலும் தை அமாவாசையை முன்னிட்டு ஏராளமானோர் நீராடி, தங்கள் முன்னோர்களுக்குத் தர்ப்பணம் செய்து ஆன்மிக வழிபாட்டில் ஈடுபட்டனர்.
