ஆப்ரேஷன் சிந்தூரில் பாகிஸ்தானின் பின்னடைவு – அவசர சட்டத் திருத்தங்களே சான்று!
ஆப்ரேஷன் சிந்தூர் நடவடிக்கையில் பாகிஸ்தான் சந்தித்த தோல்வியை, அந்நாடு அவசரமாக கொண்டு வந்த அரசியலமைப்புச் சட்ட மாற்றங்களே வெளிப்படையாக நிரூபிக்கின்றன என்று இந்திய முப்படைகளின் தலைமை தளபதி ஜெனரல் அனில் சௌகான் தெரிவித்துள்ளார்.
சுதந்திரப் போராட்ட வீரர் கோபால கிருஷ்ண கோகலேவின் நினைவாக புனே நகரில் இயங்கி வரும் கோகலே அரசியல் மற்றும் பொருளாதார ஆய்வு நிறுவனம் சார்பில், இந்த ஆண்டிற்கான புனே பொதுக் கொள்கை மாநாடு நடைபெற்றது. இதில் சிறப்பு விருந்தினராக கலந்து கொண்டு உரையாற்றிய ஜெனரல் அனில் சௌகான், ஆப்ரேஷன் சிந்தூரின் பின்னணி, இந்தியாவின் ராணுவ வெற்றி மற்றும் பாகிஸ்தானின் தந்திர ரீதியான தோல்வி குறித்து விரிவாக விளக்கினார்.
ஆப்ரேஷன் சிந்தூர் நடவடிக்கை தற்காலிகமாக நிறுத்தப்பட்ட உடனேயே, பாகிஸ்தான் அரசாங்கம் மேற்கொண்ட அவசர அரசியலமைப்புத் திருத்தங்கள், அந்த நாட்டின் போர்த் தோல்வியை மறைக்க முடியாத அளவுக்கு வெளிக்காட்டுகின்றன என்று அவர் குறிப்பிட்டார்.
குறிப்பாக, பாகிஸ்தான் அரசியலமைப்பின் 243வது பிரிவில் செய்யப்பட்ட மாற்றங்கள், அந்நாட்டின் பாதுகாப்பு கட்டமைப்பில் அடிப்படை மாற்றங்களை ஏற்படுத்தியுள்ளன. இதன் மூலம், கூட்டுத் தலைமை ஊழியர் குழுத் தலைவர் பதவி நீக்கப்பட்டு, அதற்குப் பதிலாக முப்படைகளின் தலைவர் என்ற புதிய பதவி உருவாக்கப்பட்டுள்ளது.
இந்த மாற்றத்தின் விளைவாக, முப்படைகளின் கட்டுப்பாடுகள் மட்டுமல்லாமல், பாதுகாப்புத் துறையின் மொத்த அதிகாரமும் ஒரே நபரின் கையில் குவிக்கப்பட்டுள்ளது. இதனுடன், தேசிய வியூகப் பிரிவு மற்றும் புதிய ராக்கெட் படைப் பிரிவு ஆகியவற்றையும் பாகிஸ்தான் அமைத்துள்ளது.
இந்த வகையான அதிகாரக் குவிப்பு, முப்படைகளின் ஒருங்கிணைந்த செயல்பாடு என்ற அடிப்படை ராணுவக் கொள்கைக்கே எதிரானது என்று அனில் சௌகான் சுட்டிக்காட்டினார். மேலும், இத்தகைய அமைப்பு மாற்றங்கள், பாகிஸ்தான் ராணுவத்துக்குள்ளேயே நிர்வாகச் சிக்கல்கள் மற்றும் உள் மோதல்களை உருவாக்கும் அபாயம் இருப்பதாகவும் அவர் எச்சரித்தார்.
இந்த மாற்றங்கள் அனைத்தும், இந்திய முப்படைகளின் செயல்திறன் மற்றும் ஒருங்கிணைந்த பாதுகாப்புத் திறனுக்குக் கிடைத்த வெற்றியை மறைமுகமாக உறுதிப்படுத்துவதோடு, பாகிஸ்தானின் தோல்வியையும் தெளிவாக வெளிப்படுத்துகின்றன என்றும் அவர் கூறினார்.
தமக்கு முப்படைத் தளபதிகள்மீது நேரடி கட்டளை அதிகாரம் இல்லாவிட்டாலும், முப்படைகளின் ஒருங்கிணைந்த செயல்பாடுகளுக்கான முழுப் பொறுப்பும் தமக்கே இருப்பதாக அனில் சௌகான் விளக்கினார். அனைத்து முக்கிய முடிவுகளும் கூட்டு ஆலோசனைகளின் மூலம் எடுக்கப்படுவதால், திட்டமிடலும் செயல்படுத்தலும் ஒருங்கிணைந்த முறையில் நடைபெறுகிறது என்றும் அவர் தெரிவித்தார்.
மேலும், ஒருங்கிணைந்த பாதுகாப்புப் பணியாளர்களின் கீழ் செயல்படும் சிறப்பு படைகள் மட்டுமல்லாமல், விண்வெளி, சைபர், மின்காந்த மற்றும் அறிவாற்றல் போர் போன்ற புதிய போர் களங்களின் மேற்பார்வை பொறுப்பும் தமக்கு வழங்கப்பட்டுள்ளதாக அவர் கூறினார்.
எதிர்கால போர்களில், புவியியல் காரணிகளை விட தொழில்நுட்பமே முக்கிய உந்துசக்தியாக இருக்கும் என்றும், தொடர்பில்லாத, இயக்கமற்ற போர் முறைகள் அதிகரிக்கும் என்றும் அனில் சௌகான் சுட்டிக்காட்டினார். அதே நேரத்தில், பாரம்பரிய தரைவழிப் போர்கள் மிகவும் கொடூரமானவையாகவும், பெரும் மனிதவளத்தை தேவைப்படுத்துபவையாகவும் இருக்கும் என்றும் அவர் கூறினார்.
பாலக்கோட், உரி, ஆப்ரேஷன் சிந்தூர் ஆகிய நடவடிக்கைகள் மட்டுமல்லாமல், டோக்லாம் மற்றும் கல்வான் எல்லை மோதல்களிலிருந்தும் இந்திய ராணுவம் பல முக்கிய பாதுகாப்புப் பாடங்களை கற்றுள்ளதாகவும் அவர் குறிப்பிட்டார்.
தேசப் பாதுகாப்பு துறையில் இதுவரை எட்டிய முன்னேற்றங்கள் குறித்த நம்பிக்கையை வெளிப்படுத்திய அனில் சௌகான், அனைத்து வகையான அவசர சூழ்நிலைகளுக்கும் பயன்படுத்தக்கூடிய ஒருங்கிணைந்த, தரப்படுத்தப்பட்ட பாதுகாப்பு அமைப்பை உருவாக்கும் பணிகள் நடைபெற்று வருவதாகவும், நிர்ணயிக்கப்பட்ட காலக்கெடுவிற்குள் அந்த கட்டமைப்பு முழுமையாக அமலுக்கு வரும் என்றும் தெரிவித்தார்.
