ஆருத்ரா தரிசன திருவிழா – சிதம்பரம் நடராஜர் ஆலய தேர்ப்பவனியில் பெருந்திரளான பக்தர்கள் பங்கேற்பு
சிதம்பரம் நடராஜர் திருக்கோயிலில் நடைபெற்ற ஆருத்ரா தரிசனத் திருவிழாவின் தேர்ப்பவனியில் ஏராளமான பக்தர்கள் கலந்து கொண்டு இறைவன் அருளைப் பெற்றனர்.
பஞ்சபூத தலங்களில் ஆகாயத் தலமாக போற்றப்படும் சிதம்பரம் நடராஜர் ஆலயத்தில், ஆருத்ரா தரிசன விழா கடந்த டிசம்பர் 25ஆம் தேதி கொடியேற்றத்துடன் துவங்கியது.
விழா நாட்களில் தினமும் இறைவனுக்கு விசேஷ அபிஷேகங்கள் மற்றும் பூஜைகள் நடைபெற்றுவந்த நிலையில், விழாவின் உச்ச நிகழ்வாக அமைந்த ஆருத்ரா தரிசன தேர்ப்பவனி மிகுந்த பக்தி உற்சாகத்துடன் நடத்தப்பட்டது.
அழகிய அலங்காரங்களுடன் தயாரிக்கப்பட்ட ஐந்து தேர்களில் விநாயகர், முருகப்பெருமான், நடராஜர், சிவகாமசுந்தரி அம்மன் மற்றும் சண்டிகேஸ்வரர் ஆகியோர் எழுந்தருளி பக்தர்களுக்கு அருள்பாலித்தனர்.
இதனைத் தொடர்ந்து, நான்கு மாட வீதிகளிலும் தேர்கள் பவனி வந்தன. ஆயிரக்கணக்கான பக்தர்கள் தேர்களை வடம் பிடித்து இழுத்து பக்தி பரவசத்தில் கலந்து கொண்டனர். அந்த வேளையில் முழங்கிய “சிவ சிவா” எனும் நாமகோஷம் வானெங்கும் எதிரொலித்தது.
தேர்ப்பவனியை முன்னிட்டு 1,500க்கும் மேற்பட்ட காவல்துறையினர் பாதுகாப்புப் பணியில் ஈடுபடுத்தப்பட்டிருந்தனர். நாளை நடைபெறவுள்ள நடராஜ பெருமானுக்கான மகா அபிஷேகமும், ஆருத்ரா தரிசனமும் சிறப்பாக நடைபெறுவதற்காக, கோயில் பொது தீட்சிதர்கள் தீவிர ஏற்பாடுகளை செய்து வருகின்றனர்.
