தேர்தலுக்கு முன் நடந்த படுகொலை – உண்மையில் அரசியல் ஆதாயம் அடைவோர் யார்?
வரும் பிப்ரவரி மாதத்தில் நடைபெற உள்ள வங்கதேச நாடாளுமன்றத் தேர்தலுக்கு முன்பாக, சுயேட்சை வேட்பாளராக களமிறங்கிய ஷெரீஃப் ஒஸ்மான் ஹாதி சுட்டுக் கொல்லப்பட்ட சம்பவம், நாட்டின் அரசியல் சூழலை கடும் குழப்பத்தில் ஆழ்த்தியுள்ளது. இந்தக் கொலை சம்பவம் யாருக்கு பயன் அளிக்கிறது என்ற கேள்வி தற்போது வங்கதேச அரசியலில் பெரும் விவாதமாக மாறியுள்ளது. இதன் காரணமாக, அவாமி லீக் மற்றும் பிஎன்பி போன்ற பிரதான அரசியல் கட்சிகளைத் தாண்டி, தீவிரவாத மற்றும் அடிப்படைவாத அமைப்புகள் மீதான சந்தேகம் அதிகரித்துள்ளது. இந்தப் பின்னணியில்தான் இச்செய்தி தொகுப்பு விரிவாக அலசுகிறது.
இந்தியாவுக்கு எதிரான கடுமையான கருத்துக்களை வெளிப்படையாக முன்வைத்து வந்தவரும், டாக்கா–8 தொகுதியில் சுயேட்சையாக போட்டியிடத் தயாராக இருந்தவருமான ஷெரீஃப் ஒஸ்மான் ஹாதி படுகொலை செய்யப்பட்டதையடுத்து, வங்கதேசத்தில் தேர்தலுக்கு முந்தைய அரசியல் சூழல் மிகுந்த பதற்றத்தை எட்டியுள்ளது. கடந்த டிசம்பர் 12ஆம் தேதி, டாக்கா நகரில் தேர்தல் பிரச்சாரத்தில் ஈடுபட்டு கொண்டிருந்த அவரை, முகமூடி அணிந்த மர்ம நபர்கள் துப்பாக்கியால் சுட்டுக் கொன்றனர்.
இந்தச் சம்பவம் நாடு முழுவதும் பெரும் அதிர்வலைகளை ஏற்படுத்தியதுடன், பல பகுதிகளில் வன்முறைச் சம்பவங்களுக்கும் வழிவகுத்தது. இதன் தொடர்ச்சியாக, இந்தியாவுக்கு எதிரான கோஷங்களும் எதிர்ப்பு நடவடிக்கைகளும் தீவிரமடைந்தன. இந்நிலையில், ஒஸ்மான் ஹாதி கொலை சம்பவத்தால் உண்மையில் யார் அரசியல் ரீதியாக ஆதாயம் பெறுகின்றனர் என்பதே தற்போதைய பிரதான கேள்வியாக மாறியுள்ளது.
அரசியல் ஆய்வாளர்கள் கூறுவதன்படி, இந்தக் கொலையால் நாட்டில் தடை செய்யப்பட்ட நிலையில் உள்ள அவாமி லீக் கட்சிக்கும், தேர்தலில் முன்னணியில் இருக்கும் பிஎன்பி கட்சிக்கும் நேரடியான அரசியல் லாபம் எதுவும் இல்லை. குறிப்பாக, டாக்கா–8 தொகுதியில் பிஎன்பி சார்பில் மூத்த அரசியல் தலைவரான மிர்சா அப்பாஸ் போட்டியிடவுள்ள நிலையில், அவருக்கு எதிராக சுயேட்சை வேட்பாளராக இருந்த ஒஸ்மான் ஹாதி குறிப்பிடத்தக்க சவாலாக இருப்பார் எனக் கருதப்படவில்லை.
அதனால், இந்தப் படுகொலை மூலம் பிஎன்பி கட்சி அரசியல் ஆதாயம் அடைந்திருக்கும் வாய்ப்பு மிகவும் குறைவு என அரசியல் வல்லுநர்கள் விளக்குகின்றனர். ஆனால், இதற்கு மாறாக, அரசியல் குழப்பம், மத அடிப்படையிலான பதற்றம் மற்றும் தேர்தல் செயல்முறையை சீர்குலைப்பதில் பயன் அடையும் தீவிரவாத அமைப்புகளுக்கே இந்தச் சம்பவம் சாதகமாக அமைந்திருக்கலாம் என்ற கருத்து வலுப்பெற்று வருகிறது.
குறிப்பாக, ஜமாத்-ஏ-இஸ்லாமி, அதன் மாணவர் அமைப்பான இஸ்லாமி சத்ரா ஷிபிர் மற்றும் அவற்றுடன் தொடர்புடைய ஆதரவு குழுக்கள் மீதுதான் சந்தேகத்தின் நிழல் அதிகமாக விழுகிறது. இந்தக் கொலை சம்பவம், சிறுபான்மையினருக்கு எதிரான தாக்குதல்களை தூண்டும் வகையிலும், ஊடகங்களை அச்சுறுத்தும் நடவடிக்கைகளுக்கும், தேர்தல் சூழலை பாதிக்கவும் பயன்படுத்தப்பட்டுள்ளதாக வங்கதேச புவியியல் அரசியல் ஆய்வாளர் நாஹித் ஹெலால் குறிப்பிட்டுள்ளார்.
ஒஸ்மான் ஹாதி கொலைக்குப் பின்னர், சில இஸ்லாமிய அடிப்படைவாத மற்றும் இந்திய எதிர்ப்பு அமைப்புகள், குற்றவாளி ஃபைசல் கரீம் இந்தியாவுக்கு தப்பிச் சென்றுவிட்டதாகக் குற்றம் சாட்டின. ஆனால், டாக்கா காவல்துறை, அவர் இந்தியா சென்றதற்கான எந்த உறுதியான ஆதாரமும் இல்லை எனத் தெளிவுபடுத்தியது. இருப்பினும், இந்த விவகாரம் இந்தியாவுக்கு எதிரான பிரசாரமாக மாற்றப்பட்டு, பொது மக்களிடையே வெறுப்பைத் தூண்டும் வகையில் பயன்படுத்தப்பட்டது.
இதன் தொடர்ச்சியாக, இந்திய தூதரகத்தை தாக்க முயற்சிகள் மேற்கொள்ளப்பட்டதாகவும், நாட்டின் பல பகுதிகளில் இந்தியாவுக்கு எதிரான முழக்கங்கள் எழுப்பப்பட்டதாகவும் தகவல்கள் வெளியாகின. இதனால், வங்கதேசம் முழுவதும் பதற்றம் நிறைந்த சூழல் நிலவியது.
மேலும், இந்தக் கொலை வழக்கில் பிரதான குற்றவாளியாக சந்தேகிக்கப்படும் ஃபைசல் கரீமுக்கு, கடந்த ஆண்டுகளில் ஜமாத்-ஏ-இஸ்லாமியுடன் தொடர்புடைய வழக்கறிஞரான முகம்மது ஷிஷிர் மொனீர் இருமுறை ஜாமீன் பெற்றுத் தந்துள்ளதாக பிஎன்பி கட்சியின் தலைவர் நிலோஃபர் சௌத்ரி மோனி குற்றம்சாட்டியுள்ளார். இந்த தகவல், ஜமாத் சார்ந்த அமைப்புகள் இந்தக் கொலையில் மறைமுகமாக ஈடுபட்டிருக்கலாம் என்ற சந்தேகத்தை மேலும் தீவிரப்படுத்தியுள்ளது.
இதற்கிடையே, வங்கதேசத் தேர்தலை முன்னிட்டு அமெரிக்காவைச் சேர்ந்த International Republican Institute நடத்திய கருத்துக் கணிப்பில், பிஎன்பி கட்சிக்கு 33 சதவீதமும், ஜமாத்-ஏ-இஸ்லாமி அமைப்புக்கு 29 சதவீதமும் ஆதரவு இருப்பதாகத் தெரிவிக்கப்பட்டுள்ளது. அவாமி லீக் கட்சி அரசியல் களத்தில் இருந்து விலக்கப்பட்டுள்ள நிலையில், ஜமாத் அமைப்பு தற்போது தனது அரசியல் செல்வாக்கை விரிவுபடுத்த முயன்று வருவதாக அரசியல் பார்வையாளர்கள் தெரிவிக்கின்றனர்.
இந்தச் சூழலில், பிரதான அரசியல் கட்சிகளைவிடவும், பயம், குழப்பம் மற்றும் மத அடிப்படையிலான பதற்றத்தை பயன்படுத்தி அரசியல் அதிகாரத்தைப் பெருக்க விரும்பும் அமைப்புகளே, ஷெரீஃப் ஒஸ்மான் ஹாதி கொலை சம்பவத்தால் அதிகமாக பயன் அடைந்துள்ளன என்பது அரசியல் நிபுணர்களின் ஒருமித்த கருத்தாக உள்ளது. எனவே, இந்தப் படுகொலை ஒரு தனிப்பட்ட அரசியல் பழிவாங்கல் மட்டுமல்லாமல், வங்கதேசத்தின் அரசியல் நிலைத்தன்மையை குலைக்கும் திட்டமிட்ட தந்திரமாகவும் பார்க்கப்படுகிறது என்பது குறிப்பிடத்தக்கது.
