விளாடிமிர் புதினின் பாதுகாப்பைக் காக்கும் அதிவிரைவு AURUS கார்!
இந்தியா பயணம் மேற்கொண்டுள்ள ரஷ்ய அதிபர் விளாடிமிர் புதின் பயன்படுத்தும் AURUS SENAT எனும் சிறப்பு வாகனம் அனைவரின் கவனத்தையும் ஈர்த்துள்ளது. உலகளவில் மிகுந்த செல்வாக்கு கொண்ட தலைவர்களில் ஒருவரான புதின் பயணிக்கும் இந்தக் காரில் உள்ள பாதுகாப்பு அம்சங்கள் என்னென்ன என்பதை விரிவாகப் பார்ப்போம்.
ரஷ்யாவை முழுமையாக தனது கட்டுப்பாட்டில் வைத்திருக்கும் வலுவான தலைவர் புதின். உள்நாட்டு நிர்வாகம் முதல் சர்வதேச தீர்மானங்கள் வரை, அவரை புறக்கணித்து முடிவுகள் எடுக்க முடியாத நிலை. இத்தகைய சக்தி வாய்ந்த நபருக்கு உலகம் முழுவதிலிருந்தும் பல்வேறு வகை அச்சுறுத்தல்கள் இருப்பது இயல்பு. உக்ரைன்–நேட்டோ–அமெரிக்கா என பல தரப்புகள் எதிரியாக நிற்கும் சூழலில் புதின் மீது பாதுகாப்பு சவால்கள் எப்போதும் இருக்கும்.
அத்தகைய சூழலில் கூட, ரஷ்யாவின் தலைவராக தனது நிலையை தக்க வைத்திருக்க வேண்டுமானால் உயர் மட்ட பாதுகாப்பை ஏந்திக் கொண்டு இயங்க வேண்டிய தேவை புதினுக்குண்டு. அவ்வாறான பாதுகாப்பின் முக்கியமான பகுதியே AURUS SENAT எனும் சங்கிலித் தடுப்புக் கார்.
ரோல்ஸ் ராய்ஸ் பாண்டம் காரின் வடிவமைப்பை ஒத்த தோற்றத்தில் இருக்கும் இந்த AURUS SENAT, 2018ஆம் ஆண்டு அறிமுகமானது. புதின் பயன்படுத்தும் இந்த வாகனத்தில் 4.4 லிட்டர் twin-turbo V8 hybrid என்ஜின் பொருத்தப்பட்டதால், ஆறு முதல் ஒன்பது விநாடிகளில் 0–100 கிமீ வேகத்தை எட்டிவிடும். மேலும் 9-speed automatic gearbox இருப்பதால், மணிக்கு 160 கிமீ வரை தடை இல்லாமல் சென்று விடும்.
5,630 மில்லிமீட்டர் நீளம், 2,000 மில்லிமீட்டர் அகலம், 1,300 மில்லிமீட்டர் உயரம் மற்றும் 3,300 மில்லிமீட்டர் வீல் பேஸ் கொண்ட இந்த செனட் காரை சிறிய அரண்மனை வண்டி எனவே கூறலாம். அதற்கேற்றபடி, விலை சுமார் ரூ. 2.5 கோடி வரை நிர்ணயிக்கப்பட்டுள்ளது.
பாதுகாப்பு விவரங்களைப் பார்த்தால், இந்த காரை சாதாரண நபர் நெருங்கவே முடியாது. துப்பாக்கிச் சூடு, குண்டு வெடிப்பு, ஏவுகணை தாக்குதல், ட்ரோன் தாக்குதல் போன்றவற்றை எதிர்கொள்ளும் வகையில் இது வடிவமைக்கப்பட்டுள்ளது. டயர்கள் சேதமடைந்தாலும் வாகன வேகம் குறையாது. விஷ வாயு தாக்குதலிலிருந்து பாதுகாக்கும் தனி Air Filtration System கூட உள்ளது.
தகவல் தொடர்பு அமைப்புகளை ஹேக் செய்ய முயன்றாலும், அதற்கு மிகுந்த எதிர்ப்பு பாதுகாப்பு இந்தக் காரில் பொருத்தப்பட்டுள்ளது. ரஷ்யாவில் உள்ளகப் பயணங்களிலும், வெளிநாட்டு அரசு பயணங்களிலும் புதின் பெரும்பாலும் இதே வாகனத்தை பயன்படுத்துவது வழக்கம்.
கடந்த சில மாதங்களுக்கு முன் சீனாவில் நடைபெற்ற ஷாங்காய் ஒத்துழைப்பு அமைப்பு மாநாட்டில் கூட, பிரதமர் மோடியுடன் பயணம் செய்தபோது புதின் இதையே பயன்படுத்தினார். இந்தியாவிற்கு சமீபத்திய அவரது வருகையிலும், இந்த AURUS SENAT காரை தனியாக விமானத்தில் ஏற்றி கொண்டு வந்துள்ளார்.
