டிஜிட்டல் இரும்புத்திரை ஏன் முக்கியம்? — சைபர் மோசடிகளுக்கு எதிரான ‘சஞ்சார் சாத்தி’ கவசம்!
உலகளவில் தனிப்பட்ட தரவு திருட்டு முதல், நாடுகடந்த உளவு நடவடிக்கைகள் வரை சைபர் குற்றங்கள் அதிவேகமாக அதிகரித்து வரும் சூழலில், இந்தியாவும் தன்னைக் காத்துக்கொள்ள பல்வேறு டிஜிட்டல் பாதுகாப்பு முயற்சிகளில் ஈடுபட்டுள்ளது. அதன் பகுதியாக, சஞ்சார் சாத்தி செயலியை கட்டாயப்படுத்தி, குடிமக்களின் தகவல் பாதுகாப்பை உறுதிசெய்ய மத்திய அரசு முன்வந்துள்ளது.
டிஜிட்டல் களவுத் தாக்குதல்களைத் தடுக்க உலக நாடுகள் ஒவ்வொன்றும் தங்களுக்கான “டிஜிட்டல் இரும்புத்திரை” வடிவமைத்துள்ளன. இந்தியாவில், சைபர் மோசடிகளை கட்டுப்படுத்தவும், திருடப்பட்ட மொபைல் போன்களை கண்டுபிடிக்கவும், சஞ்சார் சாத்தி முக்கிய கருவியாக பயன்படுத்தப்படுகிறது. இனி வெளியிடப்படும் அனைத்து ஸ்மார்ட்போன்களிலும் இந்த செயலி கட்டாயம் சேர்க்கப்பட வேண்டும் என்றும், ஏற்கனவே பயன்பாட்டில் உள்ள போன்களுக்கு மென்பொருள் புதுப்பிப்பு மூலம் ஆப் நிறுவப்பட வேண்டும் என்றும் மத்திய அரசு உத்தரவிட்டுள்ளது. இதனை எதிர்க்கட்சிகள் “அரசின் கண்காணிப்பு கருவி” என விமர்சித்துள்ளன.
இந்த குற்றச்சாட்டுகளை மத்திய அமைச்சர் ஜோதிராதித்ய சிந்தியா மறுத்துள்ளார். சஞ்சார் சாத்தி மூலம் யாரையும் உளவு பார்க்க முடியாது, இது மக்கள் பாதுகாப்பை மேம்படுத்தும் கருவி மட்டுமே என்று அவர் விளக்கம் வழங்கியுள்ளார். மேலும், தேவைப்படும் இடங்களில் விதிகளை மேம்படுத்த மக்கள் கருத்துகளையும் ஏற்கத் தயார் என தெரிவித்துள்ளார்.
சைபர் பாதுகாப்பில் முன்னேறிய நாடுகளைப் பார்த்தால், இந்தியாவின் இந்த நடவடிக்கை இயல்பானதாகவே தெரிகிறது. ரஷ்யாவில், ஸ்மார்ட்போன், டேப்லெட்டை சேர்த்து அனைத்து சாதனங்களிலும் 19 முக்கிய செயலிகளை கட்டாயமாக நிறுவ வேண்டும். அரசு வழங்கும் கோசுஸ்லுகி செயலியிலிருந்து புதிய MAX Super App வரை பல பாதுகாப்பு செயலிகள் அங்கு அவசியமாக்கப்பட்டுள்ளன.
சீனாவில், “Cyberspace Administration of China” மற்றும் “Ministry of Public Security” மூலம் கடுமையான டிஜிட்டல் கண்காணிப்பு அமைப்பு இயங்குகிறது. “சீனாவின் மகா ஃபயர்வால்” என அழைக்கப்படும் பாதுகாப்பு அமைப்பு, சந்தேகமான வலைத்தளங்களையும், ஃபிஷிங் பக்கங்களையும் முற்றிலும் தடை செய்கிறது.
அமெரிக்கா மற்றும் பிரிட்டன் போன்ற நாடுகள் பல படிகளைக் கொண்ட பாதுகாப்பு அமைப்புகளை நம்புகின்றன. அமெரிக்காவின் IC3 (Internet Crime Complaint Center) மையம் சைபர் மோசடிகளைக் குறித்த புகார்களை ஏற்று நடவடிக்கை எடுக்கிறது. அதேபோல், ஃபெடரல் டிரேட் கமிஷன் மோசடி செய்பவர்களுக்கு தண்டனைகள் வழங்குகிறது. பிரிட்டனின் National Fraud and Cyber Crime Reporting Centre ஃபிஷிங் மற்றும் தீங்கு விளைவிக்கும் லிங்குகளை அகற்றுகிறது.
சிங்கப்பூர், ScamShield போன்ற தொழில்நுட்ப அடிப்படையிலான கருவிகளைக் கொண்டு மோசடி அழைப்புகள் மற்றும் செய்திகளை துல்லியமாக தடுக்கும் திறனைக் கொண்டுள்ளது. ஐரோப்பிய ஒன்றியத்தின் “Cyber Resilience Act” மற்றும் “Digital Services Act” ஆகியவை ஒவ்வொரு சாதனத்துக்கும் அவசியமான பாதுகாப்பு புதுப்பிப்புகளை வழங்குவதை உறுதிசெய்து, கூகுள், மெட்டா, டிக்டோக் போன்ற பெரிய தளங்களுக்கு கடுமையான பொறுப்புகளை விதிக்கின்றன.
சீனாவின் டிஜிட்டல் சுவர் முதல் ஐரோப்பிய ஒன்றியத்தின் புதிய சட்டங்கள் வரை, உலகளவில் சைபர் பாதுகாப்புக்கான தடுப்புக் கட்டமைப்புகள் அதிகரித்துவரும் நிலையில், டிஜிட்டல் இரும்புத்திரையின் அவசியம் தெளிவாகிறது.
அதேபோல், ரஷ்யா, பிரிட்டன், அமெரிக்கா, சிங்கப்பூர் போன்ற நாடுகளைப் போல, இந்தியாவும் பொதுமக்களை சைபர் அபாயங்களிலிருந்து காக்கும் நோக்கில் சஞ்சார் சாத்தி செயலியை முன்னிறுத்தியுள்ளது. இது நாட்டின் டிஜிட்டல் பாதுகாப்பு வலிமையை அதிகரிக்கும் நடவடிக்கையாகக் கருதப்படுகிறது.
