SIPRI உலக தரவரிசையில் இந்தியாவின் 3 பாதுகாப்பு நிறுவனங்கள் இடம் பெற்றன
உலகின் முன்னணி ஆயுத உற்பத்தி நிறுவனங்களின் 2024-ம் ஆண்டுக்கான SIPRI பட்டியலில், இந்தியாவின் மூன்று முக்கிய பாதுகாப்பு நிறுவனங்கள் — Hindustan Aeronautics Limited (HAL), Bharat Electronics Limited (BEL) மற்றும் Mazagon Dock Shipbuilders Limited (MDSL) — இடம்பிடித்துள்ளன.
கடந்த ஆண்டில் இந்த மூன்று நிறுவனங்களும் சேர்த்து 8.2% வளர்ச்சி பெற்று, மொத்தத்தில் 7.5 பில்லியன் அமெரிக்க டாலர் ஆயுத வருவாயை ஈட்டியிருப்பதாக SIPRI தரவுகள் தெரிவிக்கின்றன.
HAL நிறுவனம் 3.8 பில்லியன் டாலர் ஆயுத வருவாயுடன் உலக தரவரிசையில் 44-வது இடம் பிடித்துள்ளது. இது முன்னாண்டை விட 0.3% குறைந்ததாகவும் குறிப்பிடப்பட்டுள்ளது.
BEL நிறுவனம் 23.6% என்ற கணிசமான வளர்ச்சியை எட்டியுள்ளதுடன், அதன் ஆயுத வருவாய் 3.8 பில்லியன் டாலராக உயர்ந்துள்ளது. இதன் காரணமாக உலக தரவரிசையில் 68-வது இடத்திலிருந்து 58-வது இடத்துக்கு முன்னேற்றம் கண்டுள்ளது.
கடற்படை மற்றும் நீர்மூழ்கிக் கப்பல் உற்பத்தியில் முன்னணி வகிக்கும் MDSL, 1.12 பில்லியன் டாலர் வருவாயுடன் 9.38% வளர்ச்சி பெற்று, 91-வது இடத்தைத் தக்க வைத்துள்ளது.
2024-ம் ஆண்டில், உலகளவில் முதல் 100 பாதுகாப்பு நிறுவனங்களின் மொத்த ஆயுத வருவாய் 679 பில்லியன் டாலர் என புதிய சாதனை படைத்துள்ளது. இதில் அமெரிக்காவின் Lockheed Martin நிறுவனம் 62 பில்லியன் டாலர் வருவாயுடன் முதலிடத்தில் உள்ளது.
SIPRI வெளியிட்ட பாதுகாப்பு செலவு தரவுகளின்படி, 2024-ல்
- இந்தியாவின் பாதுகாப்பு செலவு: 86.23 பில்லியன் USD
- பாகிஸ்தான்: 10.165 பில்லியன் USD
- சீனா: 313.67 பில்லியன் USD
எனவும் குறிப்பிடப்பட்டுள்ளது.
