பணியைத் தொடங்கிய NISAR : விண்வெளியில் இருந்து வந்த முதல் HD தரப் பதிவு!
உலகின் மிக அதிக செலவில் உருவாக்கப்பட்ட NISAR செயற்கைக்கோள் விண்ணில் செலுத்தப்பட்டு 100 நாட்கள் நிறைவு பெறும் நேரத்தில், அது எடுத்த முதல் தெளிவான உயர் தீர்மானப் படத்தை இஸ்ரோ வெளியிட்டுள்ளது. புவி கண்காணிப்பு திறனை மட்டும் அல்லாது, எதிர்கால விண்வெளி ஆய்வுகளுக்கான புதிய அடித்தளமாகவும் நிசார் செயல்படும் என இஸ்ரோ தெரிவித்துள்ளது.
2015 ஆம் ஆண்டு அமெரிக்க அதிபராக இருந்த பராக் ஒபாமா இந்தியாவுக்கு விஜயம் செய்தபோது, நவீன ரேடார் தொழில்நுட்பத்துடன் கூடிய செயற்கைக்கோளை இணைந்து உருவாக்க இந்தியா–அமெரிக்கா இடையே ஒப்பந்தம் செய்யப்பட்டு, அதனைத் தொடர்ந்து இஸ்ரோ–நாசா கூட்டணியில் நிசார் திட்டப் பணிகள் தொடங்கின.
10 ஆண்டுகள் நீண்ட வடிவமைப்பு மற்றும் சோதனைகள் முடிவில், 2,393 கிலோ எடை கொண்ட நிசார் செயற்கைக்கோள் இந்தியா–அமெரிக்கா இணைந்து சுமார் 12,500 கோடி ரூபாய் செலவில் உருவாக்கப்பட்டது. இது கடந்த ஜூலை 30ஆம் தேதி மாலை 5.40 மணிக்கு ஸ்ரீஹரிகோட்டாவில் உள்ள இரண்டாவது ஏவுதளத்தில் இருந்து GSLV-F16 ராக்கெட்டில் மூலம் வெற்றிகரமாக விண்ணில் அனுப்பப்பட்டது.
வெற்றிகரமான பிரிதலுக்கு 19 நிமிடங்கள் கழித்து, பூமியிலிருந்து 740 கிமீ உயரத்தில் உள்ள சூரிய ஒத்திசைவு சுற்றுப்பாதையில் செயற்கைக்கோள் நிச்சயமாக நிலை கொண்டது. 12 நாட்களுக்கு ஒருமுறை பூமியை முழுவதும் சுற்றி, துல்லியமான தரவுகளுக்கும் உயர் தெளிவு படங்களுக்கும் தேவையான இரட்டை ரேடார் அமைப்புகள் இதில் பொருத்தப்பட்டுள்ளன.
நாசாவின் L–Band மற்றும் இஸ்ரோவின் S–Band ரேடார்களை ஒரே செயற்கைக்கோளில் இணைத்து பயன்படுத்தும் உலகின் முதல் செயற்கைக்கோள் இதுவாகும். இதற்காக நிசாரில் பொருத்தப்பட்ட 12 மீட்டர் அகல Reflector கடந்த ஆகஸ்ட் 9 முதல் ஐந்து நாட்களின் பின்னர் முழுமையாக விரிக்கப்பட்டு 9 மீட்டர் உயரத்தில் நிலைநிறுத்தப்பட்டது.
பின்னர் ஆகஸ்ட் 19ஆம் தேதி அதிகாரப்பூர்வமாக அறிவியல் பணியைத் தொடங்கிய நிசார், நிலப்பரப்பு, நீர்நிலைகள், பனிப்பரப்புகள் போன்றவற்றில் ஏற்படும் மெல்லிய மாற்றங்களையும் மிகத் துல்லியமாக பதிவுசெய்கிறது. இதன் S–Band ரேடார் எடுத்த முதல் படங்களில், கோதாவரி டெல்டா பகுதியின் சதுப்புநிலங்கள், பயிர்க்களங்கள், பாக்கு பயிர்கள் மற்றும் மீன்வளக் குளங்கள் தெளிவாகப் பதிவாகியுள்ளன.
குஜராத், அகமதாபாத் உள்ளிட்ட பல இடங்களில் உள்ள அளவுத்திருத்த reflectors-ன் மூலம், மேலும் அமேசான் மழைக்காடுகளைக் கொண்டு செய்யப்பட்ட துல்லியப்பரிசோதனைகளின் அடிப்படையில் படத் தரம் சரிபார்க்கப்பட்டுள்ளதாக இஸ்ரோ அறிவித்துள்ளது.
ஆகஸ்ட் 19 முதல் இன்றுவரை, S–Band ரேடார் இந்தியா மற்றும் உலகின் பல்வேறு சோதனை–சரிபார்ப்பு தளங்களை தொடர்ந்து பதிவுசெய்து வருகிறது. மழை, இரவு, மேகமூட்டம் போன்ற எந்த வானிலைத் தடையும் இவ்வமைப்பை பாதிக்காது என்பது இதன் சிறப்பு.
விவசாய தகவல் மேலாண்மை, நீர்நிலை கண்காணிப்பு, கடல்மட்ட உயர்வு புள்ளிவிவரங்கள், பேரிடர் மேலாண்மை ஆகிய பல துறைகளிலும் நிசார் மிக முக்கிய பங்கை வகிக்கவுள்ளது.
