தீபாவளிக்கு பாகிஸ்தான் தலைவர்கள் ஆசிப் அலி சர்தாரி, ஷெபாஸ் ஷெரீப் வாழ்த்து
பாகிஸ்தான் அதிபர் ஆசிப் அலி சர்தாரி மற்றும் பிரதமர் ஷெபாஸ் ஷெரீப் ஆகியோர், பாகிஸ்தானிலும் உலகெங்கிலும் வாழும் இந்து மக்களுக்கு தீபாவளி நல்வாழ்த்துகளைத் தெரிவித்துள்ளனர்.
அதிபர் ஆசிப் அலி சர்தாரி தனது வாழ்த்துச் செய்தியில் கூறியதாவது:
“இருளை ஒளி வெல்வதையும், தீமையை நன்மை வெல்வதையும் தீபாவளி நினைவூட்டுகிறது. இந்த பண்டிகை நம்பிக்கை, நேர்மறை எண்ணம் மற்றும் ஒற்றுமையின் அடையாளமாக திகழ்கிறது.
பாகிஸ்தான் அரசியலமைப்பு அனைத்து குடிமக்களுக்கும் சம உரிமைகளையும், முழுமையான மத சுதந்திரத்தையும் உறுதி செய்கிறது. சிறுபான்மையினர் பாகுபாடு இன்றி சம வாய்ப்புகளை பெறும் பாகிஸ்தானை முகமது அலி ஜின்னா கனவு கண்டார்,” என அவர் குறிப்பிட்டார்.
பிரதமர் ஷெபாஸ் ஷெரீப் தனது வாழ்த்துச் செய்தியில் தெரிவித்ததாவது:
“பாகிஸ்தான் அரசு, மதம் அல்லது நம்பிக்கை எதுவாக இருந்தாலும், ஒவ்வொரு சமூகத்திற்கும் சமத்துவம், நலன் மற்றும் முன்னேற்றத்தை வழங்க உறுதியாக உள்ளது.
வீடுகளும் இதயங்களும் தீபாவளி ஒளியால் பிரகாசிக்கட்டும். இந்த பண்டிகை இருளை அகற்றி நல்லிணக்கத்தையும் அமைதியையும் செழிப்பையும் நமக்கு வழங்கட்டும்.
தீபாவளியின் உணர்வு, சகிப்பின்மை மற்றும் சமத்துவமின்மை போன்ற சமூக சவால்களை சமாளிக்க கூட்டு முயற்சிகளை ஊக்குவிக்கிறது. அனைத்து மதங்களுக்கும் மரியாதை மற்றும் சகிப்புத்தன்மை நிறைந்த சூழலை உருவாக்க அரசாங்கம் முழுமையாக அர்ப்பணிக்கப்பட்டுள்ளது,” என்றார்.
பாகிஸ்தான் முழுவதும் இந்துக்கள் பாரம்பரிய முறையில் தீபாவளியை உற்சாகமாகக் கொண்டாடினர். கோயில்கள் விளக்குகளால் அலங்கரிக்கப்பட்டு, வீடுகளில் பூஜைகள் நடத்தப்பட்டன. இனிப்புகள் பரிமாறிக் கொள்ளப்பட்டு, செழிப்பு மற்றும் அமைதிக்காக பிரார்த்தனைகள் மேற்கொள்ளப்பட்டன.
சிந்து மாகாணம் மற்றும் தெற்கு பஞ்சாப் பகுதிகளில் பட்டாசுகள் வெடித்து மக்கள் மகிழ்ச்சியை வெளிப்படுத்தினர். கராச்சியில் உள்ள சுவாமி நாராயண கோயிலில் நூற்றுக்கணக்கான பக்தர்கள் சிறப்பு வழிபாடுகளில் கலந்து கொண்டனர்.
மேலும், பஞ்சாப் முதல்வர் மரியம் நவாஸ், பாகிஸ்தான் மக்கள் கட்சித் தலைவர் பிலாவல் பூட்டோ உள்ளிட்டோரும் தீபாவளி வாழ்த்துகளைத் தெரிவித்தனர். இதற்கிடையில், சிந்து மாகாண அரசு தீபாவளி நாளை இந்து மக்களுக்கு பொது விடுமுறை என அறிவித்தது. கராச்சியில் உள்ள ஆளுநர் மாளிகையில் சிறப்பு பூஜைகள் நடைபெற்று, கேக் வெட்டி தீபாவளி கொண்டாடப்பட்டது.
